Koek met geheime sjokoladehart
Dit mag dalk lyk na baie werk, maar dit verg net ’ n klein bietjie ekstra tyd – jy moet die beslag twee maal aanmaak vir sjokoladehart en vanieljekoek. GENOEG VIR 1 KOEK
KOEK (hoeveelhede genoeg vir een beslag – maak twee keer aan) • 125 g sagte botter
• 210 g strooisuiker
• 2 ekstragroot eiers
• 5 ml vanieljegeursel
• 240 g koekmeel en
40 g kakaopoeier vir die sjokoladekoek (gebruik
280 g koekmeel vir die vanieljekoek)
• 10 ml bakpoeier
• knypie sout
• 250 ml melk
• klein suikerblommetjies
vir versiering
VERSIERSEL (maak een keer aan) • 130 g versiersuiker
• 10 g kakaopoeier
• 30 ml kookwater
Maak eers sjokoladekoek: Verhit oond tot 180 °C. Klits botter en strooisuiker saam tot lig en romerig. Voeg eiers by en klits goed. Voeg vanieljegeursel by en klits. Sif koekmeel, kakaopoeier, bakpoeier en sout saam in ’n bak en vou om die beurt met die melk by die bottermengsel in.
Skep sjokoladekoekbeslag in ’n gesmeerde broodpan. Plaas in warm oond en bak vir
50- 60 minute of tot dit gaar is en ’n toetspen skoon uitkom.
Haal koek uit oond en sit eenkant om heeltemal af te koel. Plaas vir ’n paar uur of oornag in yskas om ferm te word. Haal uit yskas en sny koek in skywe van 2 cm dik. Pak skywe op ’n plat oppervlak uit en gebruik hart-koekiedrukker om ’n hart in die middel van elke sny te druk. Hou hartvorms eenkant en gebruik afvalstukke vir ’n trifle of om sjokoladetruffels te maak.
Maak nou vanieljekoek: Verhit oond tot 180 °C. Maak beslag net soos vir sjokoladekoek aan, maar pas die hoeveelheid meel aan en moenie kakao byvoeg nie. Smeer ’n derde van die beslag oor die basis van ’n broodpan wat met bakpapier uitgevoer en met kleefwerende kossproei gespuit is. Pak sjokoladeharte regop in middel van die vanieljekoekbeslag in pan. Skep orige beslag versigtig om en oor die sjokoladeharte. Plaas in oond en bak in warm oond vir 45-55 minute of tot gaar. Haal uit oond en sit eenkant om heeltemal af te koel.
Versiersel: Keer koek uit pan.
Sif versiersuiker en kakao saam in ’n bak. Roer kookwater bietjies-bietjies by om ’n gladde, smeerbare versiersel te vorm. Smeer oor koek en versier met klein suikerblommetjies. Sny koek versigtig in skywe sodat jy die geheime hart kan sien.