Hamburgers, floats en ’n blêrkas
Hamburgers waarvoor jy jou eie patties maak, is altyd ’n wenner. GENOEG VIR 6-8
• 20 ml olyfolie
• 1 ui, fyngekap
• 750 g beesmaalvleis
• 15 ml Franse mosterd
• hand vol gekapte platblaar
pietersielie
• 15 ml dik tamatiesous
• 1 groot eiergeel
• 8 hamburgerrolletjies • mayonnaise
• slaai vir voorsit
Verhit olyfolie en braai ui tot sag. Laat dit eenkant afkoel. Meng die maalvleis, mosterd, pietersielie, tamatiesous en eiergeel saam. Voeg die uie by en geur na smaak. Rol mengsel in frikkadelle en sit vir 30 minute of langer in die yskas. Druk die frikkadelle platter om patties te vorm. Maak gaar in ’n riffelpan, onder die oond se roosterelement of oor die kole – so 3-4 minute aan elke kant. Rooster die binnekant van die hamburgerrolletjies, smeer mayonnaise op die onderste helfte en pak die gaar pattie en slaai of ’n vulsel van jou keuse bo-op. Sit dadelik voor met slaptjips en uieringe.
Gaan na SARIE.com vir ’n resep vir uieringe.