Nostalgiese Danielskraal

Anderkant Calitzdorp kronkel die pad verby vrugteboorde en wingerde. Dan, as jy afsak deur die Karooveld, staan die grasdakhuis daar asof dit net vir jou gewag het. Vir Ian en Rosheen Kriegler is dit ’n plek om te rus en ontlaai

Die Krieglers het heel toevallig ’n advertensie vir Danielskraal in ’n tydskrif gesien en by die eerste geleentheid van Johannesburg af gevlieg om na die plaas te kom kyk. Veral Rosheen is mal oor die Karoo en Ian het gesien dat hy hier heerlik sal kan fietsry. Hulle het daar en dan besluit om Danielskraal te koop (www.danielskraalfarm.com).

Min het hulle geweet dat die 2 300 hektaar ’n ryke wild- en voëllewe huisves. Die grootste verskeidenheid vetplantspesies per vierkante meter in die wêreld is ook hier te kry, sê hulle. Nog ’n verrassing was dat daar genoeg water is om aan die Klein Karoo Landelike Watervoorsieningskema water te kan verskaf.

Die huis is teen 1836 gebou en Ian vertel dat die ou wapad, wat aan die agterkant verbyloop en nog plek-plek sigbaar is, die oorspronklike wa-roete tussen Kaapstad en Grahamstad was. Jy kry so ’n klein ruggraat-rilling as jy hoor dat C.J. Langenhoven se spookstorie “Die vrou voor die hek” juis op dié wapad afgespeel het.

Die Krieglers het die huis pragtig gerestoureer sonder om karakter prys te gee. Rosheen het self die dekor gedoen en dit voel asof jy al lank hierdie plek ken.

Vir hulle is Chris Steer en Sally Manson wat die plaas behartig en na die gaste omsien, die grootste aanwins. Iets waarvan die SARIE-span kan getuig. Ons is so warm en vriendelik ontvang en geen moeite is ontsien om ons tuis te laat voel nie.