Die tweelinghuis

Twee argiteksvriende, Jan Desseyn en Richard Perfect, het hierdie skakelhuise in die ou deel van Robertson as heerlike wegbreekhuise ingerig

Jan vertel dat hy eintlik ’n plasie in die distrik wou aanskaf nadat vriende ’n huis (sien bl. 88) hier gekoop het. Die soektog het niks opgelewer nie totdat Jan op dié ongeslypte diamant op die dorp afgekom het. Hy het Richard daar en dan gebel en dit het min oortuiging geverg: Hulle het sommer nog dieselfde dag besluit om dit te koop.

Die oorspronklike vier skakelhuise, wat waarskynlik aan ambagsmanne behoort het, is later in twee skakelhuise omskep. Toe hulle dit koop, was dit een groot woonhuis. Dit was leefbaar, maar hulle wou dit weer in twee verdeel. Dit sou heelwat restourasie verg, maar Jan en Richard het kans gesien. Min is aan die struktuur verander, maar ’n gemeenskaplike stoep met twee slaapkamers is aan die agterkant aangebou. Jan beskryf die stoep as die hartklop van die twee huise.