Min-moeite-tuin
GEBRUIIK JOU MURE
Somer en winter kuier die gesin hier. Muurspasie is weer benut met smal plantbakke waarin hulle slaai, kruie en vetplante plant. En vir warm dae is daar ’n buitestort.
MAAK DIT MOOI EN PRAKTIES
Die en suite-badkamer is ’n smal vertrek die lengte van die slaapkamer met die toilet en wasbak aan die een kant en stort aan die ander kant. Hier is ook rakke tussen die wasbak en stort opgesit met ’n reuse-spieël bo die wasbak. Die vloer is afgevlakte sement wat verseël is. Soortgelyke teëls is by CTM te kry.
KALM KLEURE VIR DIE SLAAPKAMER
Die slaapkamer het ook ’n rak bo die bed wat as bedkassie dien. ’n Aanknipliggie is ’n slim oplossing vir ’n bedlampie. Die kapstok sorg dat kasspasie meer is. Die deken en strooikussings is al kleur in die vertrek. Benut die spasie agter ’n deur. Sit hier hake op waar jy bv. jou krale en serpe of handsakke of selfs ’n skoensak kan ophang.
VROLIKE SPEELPLEK
Die speelkamer in die nok van die dak is elke kind se droom, met ’n tent, rakke vol speelgoed en ’n lekker diep ingeboude bed waar jy kan rus as jy moeg gespeel is, of waar gaste kan oorslaap. Die mure is versier met diereprente.
HULLE HOU VAN KLEUR
Olivia en Neve se kamer is op die grondvloer en hul lae en veilige stapelbed van Ikea het Mari aanlyn op www. nevadafurniture. co.za gekoop. Die kunswerke bo die skuifdeur (wat na hul badkamer lei) is Olivia s’n.
DIS BADTYD
Die klein bad, letterlik so groot soos ’n halwe bad, het hulle tweedehands raakgeloop. Dis perfek vir die twee kleintjies, maar is ook groot genoeg vir ’n volwassene. Die wasgoedmandjie hang aan ’n stewige geel haak om die vloerspasie oop te hou. Aan die teenoorstaande muur is ’n wasmasjien en tuimeldroër geïnstalleer.