Min moeite, heerlike ete LANCEWOOD® Romerige hoender met sampioene
Bederf jou mense met dié maklike hoendergereg met sampioene en die romerige tekstuur van LANCEWOOD® se maaskaas. Binne minute het jy heerlike kos op die tafel!
Gebruik ‘n skoon plastieksak en meng die meel, sout en peper daarin. Plaas die helfte van die hoenderborsies in sak en bind sak stewig toe. Skud rond tot die hoender met meel bedek is. Verwyder die hoender uit sak en skud ekstra meel af. Herhaal met oorblywende hoender. Verhit botter en olie in braaipan tot warm en braai die hoenderstukke tot goudbruin. Skep uit en hou eenkant. Braai uie en sampioene in dieselfde pan tot goudbruin en gaar. Voeg die gebraaide hoender, LANCEWOOD
® Creamed Smooth Cottage Cheese, melk en suurlemoensap by. Geur goed met sout en peper. Bring tot kookpunt en laat prut vir 5 – 8 minute of tot hoender gaar is. Sit voor met parmesaan en pietersielie op rys, koeskoes of noedels.
‘As jy weet wat jou laat tiek, doen dit!’
Kalmte, styl en sagte geure omvou jou as jy in De Waterkant, Kaapstad, by dié gerestoureerde eertydse Maleierhuis instap.
’n Klassieke roomkleurige sofa op ’n Persiese tapyt nooi jou om te sit.
Michelle Knapp, eienaar van die enigste Santa Maria Novellaparfuumboetiek in Suid-afrika, lyk Italiaans met haar swartbruin oë en glansende donkerbruin hare.
Die Italiaanse Santa Maria Novellahandelsmerk het sy oorsprong 800 jaar gelede in Florence by Dominikaanse monnike gehad. Hulle het in die 16de eeu parfuum gemaak vir Catherine de Medici, van een van die magtigste families in Florence, toe sy getroud is met Henry II, die toekomstige koning van Frankryk. Catherine, “my heldin”, vertel Michelle, het later koningin van Frankryk geword.
Toe Michelle in 2011 op ’n vriendin se aandrang die Santa Maria Novellabasilika in Florence besoek het, was dit vir haar ’n spirituele ervaring. “Dit was ’n snikhete dag, maar binnekant heerlik koel, met lieflike marmervloere en die wonderlikste geure van die geurwinkel daarnaas.”
In die ou klooster, wat vandag ’n museum en winkel is, het Michelle hope produkte gekoop en begeester na SuidAfrika teruggekeer. “Ek het geweet ek moes dié passie vlerke gee . ..”
As modeontwerper het sy toe reeds jare lank in die korporatiewe wêreld gewerk vir handelsmerke soos Adidas, Ackermans en Truworths.
“Maar die rigiede korporatiewe wêreld smoor dikwels kreatiwiteit. As jy middein dit is, kry jy soms tonnelvisie en glo jy jy kan niks anders doen nie.”
Meer as drie jaar gelede het Michelle ’n berekende risiko geneem. Sy het bedank en die parfuumboetiek begin. Sedertdien werk sy vir haarself. Dit is terselfdertyd “vreesaanjaend én bemagtigend”, sê sy.
“Dalk het dit gehelp dat my pa, Daniël, ’n entrepreneur was. Hy het ’n skoenfabriek met ’n Italiaanse skoenmaker in Maitland, Kaapstad, besit. Ek onthou die geur van leer en skoengom en my pa se passie vir Italië.”
Die Britse biljoenêr Richard Branson se Screw It, Let’s Do It (Penguin Random House) het haar ook oortuig jy moet droom en nie toelaat dat hindernisse jou pootjie nie. “Elkeen kan ’n entrepreneur wees, maar angs hou jou terug. As jy weet wat jou laat tiek, visualiseer dit, doen jou huiswerk en dóén dit net.”
Michelle het wel besef sy moet die Italianers reg benader as sy ’n SMNparfuumboetiek plaaslik wil oopmaak. “My voorlegging om die regte tot dié handelsmerk te verkry was persoonlik. Dít is hoe jy die Italianers, familiemense, benader. Ek het boonop beklemtoon dat Suid-afrika danksy die Wêreldbekersokkertoernooi in 2010 internasionaal gewild is, dat ek die handelsmerk met respek sal hanteer en eksklusief sal hou.
“Ek gló in die produk en gebruik dit self. Mense hou van goeie geure en is al hoe meer gesteld op parfuum, ’n onderbeklemtoonde luukse. Geur is gevul met emosie – elkeen koppel unieke ervarings daaraan.”
Sy haal ’n elegante botteltjie parfuum, Calycanthus, van die rak. “Dié blom [ Calycanthus] herinner my aan my ouma.”
Daar is altesame 50 geure in haar winkel. Almal van natuurlike olies.
“Of dit ons kerse, seep, lyf- of gesigprodukte of potpourri is – dit is soos ’n mooi ruiker blomme en maak my gelukkig.
“Dit is die ideale werk vir ’n gesinsmens, want ek kan van die huis af werk. Dis vir my belangrik om genoeg tyd met my man, Dirk, en ons eersgeborene, Sofia (1), te bestee. Volgende jaar wil ons nóg ’n baba hê, maar ek dink al klaar daaraan om nóg ’n onderneming te begin.” Sy hoop om ook ’n Smn-parfuumboetiek in Johannesburg te open.
Sy het wel haar kwota bekommernisse. “Dit is moeilik om die produkte in te voer met ons swak wisselkoers. Ons regering kan ook gerus meer doen om kleinsake-ondernemings te ondersteun. Al die rompslomp is iets vreesliks.”
Michelle reken Suid-afrika het méér entrepreneurs nodig om meer werk aan ander te bied. >