Wie woon hier? Ryno, Marita en klein Olivia Palm Waar?
RUIM EN LIG
Tipies van die huise van die 50’s-era was daar ’n klomp kleiner vertrekke. Met die hulp van Marita se pa en oom, wat ook die eerste huis se restourasie gedoen het, het hulle genadeloos mure uitgeslaan om ’n ruim leefarea en eetkamer te skep. Die klavier, wat eers skokpienk was, is nou goud om by die plafonlig en spieël te pas. Die donker muurkleur is Dulux se Night Jewels 4. Veelkleurige kussings versag die leerbanke en die blou fluweelstoele is in pas met die nuutste trend. Die bestaande staalvensterrame is swart geverf vir ’n industriële voorkoms.
STAL DIT UIT
Die swart staalrak en koffietafel het Marita se broer gemaak. Hier het sy ook die industriële voorkoms herhaal met die rakke en swart staalpote van die ronde koffietafel. Die oorspronklike matte is gelig en die merantivloer was nog in ’n perfekte toestand.
LUUKS IN BLOU FLUWEEL
Op pad na die kombuis is ’n sithoek ingerig met ’n bank in luukse blou fluweel. Die vloere hier en in die kombuis was met volvloer-viniel bedek. Om koste te bespaar is dit gelig en die sement is ’n laag vloerverf gegee.
WenkSKEP IMPAK
Wanneer die voordeur oopswaai, begroet hierdie geblomde muur jou. Die plakpapier is deur Robin Sprong (ook beskikbaar by Eiffinger, versprei deur Dreamweaver Studios, www. dreamweaverstudios.co.za). Die rottangstoel en lig vorm ’n interessante kontras met die plakpapier.
’N RUIM BADKAMER
Die badkamer is vergroot deur die ingeboude linnekas uit te haal. Sodoende kon hulle tweelingwasbakke en ’n dubbele stort installeer. Die teëls (Moroccan Warehouse), naakte ligte, swart skuifdeurrame en koper loodgieterpype is alles in pas met die nuutste tendense.
KOMBUIS VOL KLEUR
Die oorspronklike kombuis was donker en beknop met ’n klein aparte spens en opwaskamertjie. Hier is mure ook uitgeslaan om ’n ruim kombuis te skep. Die bestaande kombuiskaste is behou en geverf en nuwe kasknoppe is aangesit. ’n Beton-raamwerk is rondom die kaste gebou en die werkblad is verseël. Oop rakke is bo die werkvlak geïnstalleer. Die oop vuurherd is omraam met kleurryke teëls van Moroccan Warehouse.
Wenk’n Vloer van afgevlakte sement is die goedkoopste opsie. Jy kan later bo-oor teël of matte lê
BUITE-AANSIG VAN HUIS
Die voorstoep is nuut geteël met geometriese teëls van Shaw Tec Durbanville (www.shawtec.co.za).
Plakpapier kan net so goed soos teëls werk. Dit is waterbestand en kan afgevee word. Die Palms het dit baie suksesvol in hul kombuis agter hul wasbak gebruik. Plakpapier van Robin Sprong www.robinsprong.com