EN JOU GESONDHEID...
Op sekere dinge weet ons vir seker die weer het ’n invloed – en hoekom. BLOEDDRUK: Wanneer atmosferiese druk verminder, val jou bloeddruk. Laer temperature veroorsaak ook dat jou bloedvate vernou. Dus is bloeddruk oor die algemeen in die somer laer, volgens Weather.com. HARTAANVAL: Vir elke 1 °C wat die temperatuur in ’n enkele dag daal, is daar sowat 200 bykomende hartaanvalle in Brittanje, volgens ’n studie in die British Medical Journal. Bloed word dan taaier, bloeddruk hoër, die hart werk harder en die risiko vir bloedklonte is waarskynlik groter, volgens scientificamerican.com. ASMA/ALLERGIEË: Die wisseling van seisoene en warmer weer vererger asma en allergiese simptome. Lugbesoedeling speel ook toenemend ’n rol. HOOFPYN: As die temperatuur verander, hetsy as gevolg van ’n hittegolf of kouefront, maak dit ’n hoofpyn/migraine meer moontlik. Sonnige, warm dae ook. En reën en veranderinge in barometriese druk. (Die lug se gewig op die aardoppervlak.) Ten spyte van die lang tou weer-sensitiewe siele is wetenskaplikes nog onseker oor die rede daarvoor, volgens webmd.com. Sowat 50% van migrainelyers is sensitief vir weerstoestande, wat barometriese druk insluit. Die weer word beskou as die tweede of derde mees algemene migraine-sneller, volgens die webtuiste www.barometricpressureheadache.com. PYN: Die koue of reënweer speel nie ’n rol in rugpyn of osteoartritis nie, dui nuwe navorsing deur die George Instituut vir Wêreldwye Gesondheid aan. Die Australiese studie is gedoen in temperature wat wissel van -5,4 °C tot 32,8 °C.
Die navorsers sê in ’n verklaring: “Die geloof dat pyn en die weer met mekaar verband hou, kom al uit die Romeinse tyd, maar navorsing wys mense herroep gebeure wat hul vooropgestelde idees bevestig.” (Bron: Netwerk24)
Gaan vertel dit vir my oorlede oupa, wat ’n donderbui beter as die weerburo kon voorspel! Dit het sy gewrigte, krom van rumatiek, glo erger laat pyn.