Wintermooi lippe
Dié seisoen se warmste lipkleure put inspirasie uit die natuur: roesbruin, sonsondergang-rooi, sandpienk en selfs steenkool-swart! Chris Williams, plaaslike grimeerkunstenaar van Estée Lauder, verduidelik hoe om dié kleure te dra
Roesbruin
Die afgelope jaar maak die 90’s-voorkoms ’n terugkeer en daarmee saam ook dié dekade se gewilde bruin lipstiffie-skakerings. Met roesbruin lyk jy supermodern, sê Chris. Enigiemand kan dié skakering dra, solank die kleur ’n warm rooi ondertoon het. Dra dit só
Kies ’n roesbruin lipstiffie met ’n satynafwerking om die kleur effens te versag. Hou die res van jou grimering lig met ’n tikkie verligter op jou wange, glans op jou ooglede en hope maskara.
Eiervrug-purper
Smeulende pers lipstiffies is steeds gewild en sê jy is waaghalsig. Vir die kouer maande is ’n purper lipstiffie met ’n bruin, swart of donkerpers ondertoon ideaal. Dra dit só
Donkerpers skakerings is geneig om jou lippe kleiner te laat lyk. As jy dunner lippe het, kies ’n purper met ’n effense blink of satynafwerking om die illusie van voller lippe te skep. ’n Matafwerking lyk mooi by vol lippe.
Steenkool-swart
Danksy die herlewing van gotiese glans in die mode- en skoonheidswêreld is swart op jou lippe tans ’n reuse-trend. As jy waaghalsig genoeg is om dié skakering te dra, kies ’n lipstiffie met ’n blink afwerking wat jy laag op laag kan aanwend om die kleur sagter of meer intens te laat lyk. ’n Gitswart skakering pas by alle vel- en haarkleure. Dra dit só
Maak jou swart lippe die fokuspunt en hou die res van jou voorkoms sag om dit uit te balanseer. Vul jou wenkbroue in en tik ’n warm blosserskakering op jou wange. Rond dan jou voorkoms af met net ’n dun lyntjie oogomlyner en maskara.
Sonsondergang-rooi
Elke vrou behoort ’n rooi lipstiffie in haar grimeersakkie te hê. Dié seisoen se rooi lipstiffie het ’n effense oranje ondertoon en laat jou jonk en vars lyk. Dra dit só
’n Rooi lipstiffie met ’n matafwerking bly ’n staatmaker. Dit hou lank op jou lippe en smeer nie maklik nie. Hou die res van jou grimering eenvoudig. Net ’n dun lyntjie vloeibare oogomlyner en maskara is nodig.
Sandpienk
’n Natuurlike ( nude) lipkleur gaan nooit uit die mode nie, sê Chris. Dié herfs is neutrale skakerings met ’n vuilpienk ondertoon gewild. Dit lyk veral mooi by ’n ligte velkleur. Dra dit só
Sagte rokerige oë met aardse oogskadu-skakerings is die perfekte pasmaat vir jou neutrale lippe. Gebruik daarmee saam ’n tikkie verbronser op jou wange vir ’n gelaat met ’n songlans in die kouer maande.