Anders, maar ons is ’n gesin
Die tradisionele kerngesin is lankal nie meer die norm nie. Met al hoe meer mense wat skei en minder wat trou, lyk die gesin van vandag dikwels heel anders
Soonlangs soos dertig jaar gelede was leerders met geskeide ouers nog die uitsondering in die klaskamer.
Deesdae lyk die prentjie heel anders. Aansienlik minder kinders kom nou uit sogenaamde “kerngesinne” wat bestaan uit dieselfde man en vrou wat trou en mettertyd ’n gesin ryker word.
Die mees onlangse sensusopname (2011) wys slegs sowat ’n derde van die ongeveer 15 miljoen Suid-afrikaanse gesinne is nog tradisionele kerngesinne, bestaande uit ’n getroude paartjie en hul kinders.
“Moderne gesinne” is al jare lank ou nuus in Hollywood. Soos die selfdegeslagegpaar komediant Rosie O’donnell en Michelle Rounds wat vyf kinders aangeneem het. (Hulle is intussen geskei.) Die akteurspaar Angelina Jolie en Brad Pitt, wat verlede jaar ná elf jaar saam uitmekaar is, was sekerlik een van die interessantste voorbeelde van so ’n saamgestelde gesin – met drie aangenome kinders uit onderskeidelik Kambodja, Viëtnam en Ethiopië asook drie biologiese kinders.
Marelise Botha, ’n sielkundige van Kaapstad, sê daar is verskillende redes hoekom die gesinstruktuur so verander het, onder meer die stygende egskeidingsyfer en minder mense wat trou. “Daar is boonop soveel enkelouer-gesinne. Vanweë beter werksgeleenthede vir vroue kan hulle hul kinders deesdae beter op hul eie onderhou,” meen sy.
Sy reken ook die swak ekonomiese groei en werkloosheid noop kerngesinne om soms by hul uitgebreide gesinne in te trek vir hulp met die versorging van die kinders. Gay verhoudings word boonop al hoe meer aanvaar, wat dit vir dié paartjies makliker maak om kinders aan te neem.
Maar die afname in kerngesinne is nie noodwendig negatief nie. “Dit leer kinders dikwels groter aanpasbaarheid, ’n baie goeie eienskap om te hê in so ’n vinnig veranderende wêreld,” sê Marelise.
Drie moderne gesinne vertel hoe hulle dit laat werk.