Dís nou luuks
Die nuwe grimeerreeks van die skoonheidshuis Dior, Colour Gradation, bevat blosser, oogskadu, naellak en lipstiffie in skakerings soos rooi, pienk, pruim, blou en koraal. Die kleurpalette, met skakerings van lig na donker, is geskep om ’n subtiele óf meer dramatiese grimeervoorkoms te skep. Pryse vanaf R425. Beskikbaar vir ’n beperkte tyd by uitsoektakke van Edgars en Red Square Hoekom is dié room sy prys werd? La Prairie Line Interception Power Duo (R5 900) is ’n dag- en nagroom slim verpak in een bottel, maar dit is in die dagroom waar die krag lê. Soos wat ons emosie op ons gesig uitdruk, vorm lagplooitjies en fyn lyntjies oor tyd. Spesiale peptiede in dié produk se dagroom belemmer jou gesigspiere se vermoë om saam te trek en help sodoende om die vorming van lyntjies te vertraag. By La Prairietoonbanke in uitsoektakke van Edgars
Hoog op teen die Himalaja-berge, daar waar die son fel brand, floreer die gentian-blom in yskoue weersomstandighede. En in Brasilië se Serra do Espinhaço-bergreeks oorleef die sempre-vivas, Portugees vir ewigdurende blomme, in uiters droë grond. Ekstrakte van dié twee unieke plante in Estée Lauder Re-nutriv Ultimate Lift Regenerating Youth Creme (R3 770) help om jou vel te verferm, bevog en glans te gee. Ander produkte in die reeks sluit in ’n ligte vogroom en ’n serum
Jy hoef nie sportief te wees om van die nuwe Aquaracer Lady-horlosie van TAG Heuer te hou nie. Dié elegante horlosie met sy blou perlemoenwyserplaat, keramiek ring met diamante en rubberbandjie met satyn-afwerking (prys op aanvraag) is vir onthaal en speel, en is waterbestand tot op ’n diepte van 300 m. Dit word versprei deur Picot & Moss. 011 669 0500; www.picotandmoss.com Die skoonheid van die driehoek as geometriese vorm is ’n toonbeeld van perfeksie, soos dié handgemaakte oorbelle van 18 karaat-witgoud met tanzanietsteen en diamante (prys op aanvraag). Hierdie ontwerp van Van Deijl, wat steun op die konsep van skoonheid uit twee wêrelde, is modern en klassiek en beeld ’n liefde en waardering vir Europa en Afrika uit. 021 914 2192; www.vandeijl.co.za
Die modehuis Alexander Mcqueen het onlangs hul uniseks Cut Lensreeks vir 2017 bekend gestel. Dis ’n unieke interpretasie van die klassieke vlieënierstyl sonbril ( Aviator) en word met die hand in Italië gemaak. Die lense word met ’n hoek gesny en het inlegsels van gefasetteerde perspeks, terwyl die Mcqueen-logo op die metaalarms gegraveer is. Die bril (vanaf R5 405) is beskikbaar in 8 kleure en word eksklusief deur SDM Eyewear versprei. 011 334 7020; www.sdmeyewear.co.za Die perfekte reisbykomstigheid. As die parfuum Coco Mademoiselle jou gunsteling is, hoef jy nou nooit daarsonder te wees nie. Dié gewilde geur van die skoonheidshuis Chanel, gevul met lemoen, roos en jasmyn, is nou vir ’n beperkte tyd in klein hervulbotteltjies beskikbaar, verpak in die mooiste pienk sakkie. Coco Mademoiselle Limited Edition Eau de Parfum Purse Spray (R1 530) bevat 3 hervul-parfuumbotteltjies van 7,5 ml elk en die pienk sakkie wat netjies in jou handsak pas.