Houtskool vir jou gesig
Al hoe meer velsorghuise reik nou na ‘swart goud’ as ’n oplossing vir velprobleme soos verstopte porieë en aknee
Houtskoolis tans baie gewild aangesien dit ’n kragtige reiniger en detoksmiddel vir jou vel is, sê Diana van Sittert, nasionale opleidingsbestuurder van Dermalogica. “In ons moderne wêreld waar osoonbesoedeling een van die grootste oorsake van velveroudering is, is ’n produk wat dieper reinig al hoe belangriker.”
Osoongas, die hoofbestanddeel in stedelike rookmis, beskadig jou velwand, laat jou porieë makliker verstop en belemmer jou vel se vermoë om homself te herstel. Op die lange duur kan dit veroorsaak dat plooie en fyn lyntjies vinniger vorm, jou vel fermheid verloor en jou veltekstuur growwer is. Om dié rede word al hoe meer velsorgprodukte soos maskers, gesigreinigers en lyfseep met houtskool as sterbestanddeel bekend gestel.
Hoe werk dit?
In skoonheidsprodukte word ’n suiwer vorm van houtskool, geaktiveerde houtskool, gebruik, sê Diana. Een so ’n houtskoolmolekule het die vermoë om tot 200 keer sy gewig in onsuiwerhede te absorbeer. Wanneer jy dit aanwend, trek die molekules vuilheid en oortollige olie in jou vel na die oppervlak, waar dit aan die molekules vasklou. Wanneer jy die houtskool van jou gesig afwas, word die onsuiwerhede daarmee saam verwyder.
Boonop is houtskool vir alle velsoorte geskik, sê Diana. Velsorgprodukte wat geformuleer is om diep en intens te reinig bevat dikwels bestanddele wat geneig is om jou vel van vog te stroop en irritasie te vererger. Omdat geaktiveerde houtskool ’n suiwer, natuurlike bestanddeel is, irriteer dit nie jou vel nie. Dit trek ook nie vog en ander belangrike voedingstowwe uit jou vel nie.
HET JY GEWEET?
Groot dosisse geaktiveerde houtskool word al sedert die 1900’s in mediese noodgevalle deur dokters gebruik om sekere gifstowwe en chemikalieë in ’n pasiënt se spysverteringstelsel vinnig te absorbeer. Dié houtskool word ook in tandepasta gebruik om die opbou van geel vlekke en plaak op jou tande te beveg sonder om die glasuur te beskadig.