Trend van die maand matcha-groentee
Die wêreld is tans gaande oor ’n nuwe ‘wonderdrankie’: matcha-groentee! Dit gee glo net soveel skop soos ’n koppie koffie, én kan help vir ’n probleemvel
Matchais groenteeblare wat tot ’n baie fyn poeier gemaal word. Die heldergroen poeier word dan met warm water gemeng en dikwels in die plek van koffie gedrink omdat dit ook kafeïen bevat.
Hoewel dié vorm van groentee al eeue lank in tradisionele Japanse teeseremonies gebruik word, het dit eers die afgelope drie jaar wêreldwye aanhang begin kry. Die aktrise Gwyneth Paltrow was van die eerste bekendes wat die voordele van die trendy groenteedrankie verkondig het. Deesdae is matcha-groentee ’n voorste verkoper in gesondheids- en teewinkels en word dit in van smoothies tot melkskommels, soetgebak en quiches gebruik. Maar waaroor die bohaai? Omdat matcha verpoeierde groenteeblare is, is dit meer gekonsentreerd as gewone groentee waar jy gedroogde groenteeblare vir ’n tydjie in warm water laat week. Dit bevat kragtige antioksidante wat die vermoë het om jou velselle teen toekomstige skade deur omgewingsfaktore soos die son, besoedeling, stres en ’n ongesonde dieet te beskerm, sê Mariza van Zyl, geregistreerde dieetkundige van die Paarl. Dit bevat ook ’n sterbestanddeel, epigallokatesjol-gallaat of EGCG, wat onder meer help om die verouderingsproses van jou velselle te vertraag sodat jou gelaat ferm en plomp lyk, vertel sy.
Studies het selfs al getoon dat hierdie bestanddeel aknee kan verbeter deurdat dit hormoonvlakke stabiliseer en só
help dat jou vel nie oortollige sebum vervaardig nie.
Probeer dit self As jy sélf die superdrankie wil beproef, maak seker jy gebruik ’n organiese matcha-poeier van hoë gehalte. Dit word veral in Japan verbou. Hoewel dit jou ’n paar rand uit die sak gaan jaag, word met ’n goeie matchapoeier verseker dat die minimum voedingstowwe verlore gaan tydens die vervaardigingsproses. Die topprodukte proe ook minder bitter as dié van ’n laer gehalte.