Kaalkop deur Nataniël

’n Fout is ’n besluit of aksie, doelbewus of per ongeluk, wat direk of indirek strek tot nadeel van een of meer lewende wesens, bekend of onbekend aan die een wat fouteer. Dikwels is dit dié een wat ly. Ek is gevra om daaroor te praat, maar ek het my gedagtes en navorsing neergeskryf, dit het gelei tot ’n verrassende dokument. Ek deel ’n verkorte weergawe:

DIE KAALKOPGIDS TOT FOUTE

GESKIEDENIS In 1788 het die Oostenrykse weermag te midde van verwarring en dronkenskap homself aangeval. Tienduisend soldate het gesterf. Hierdie belaglike gebeurtenis verskyn bo-aan elke lys van die wêreld se grootste foute. Die geskiedenis is ryk aan voorbeelde van hoe dwaasheid die wêreld gevorm het. Die moord op Caesar, die mag van Hitler, die afbrand van talle biblioteke, tonne olie in die see, sterftes weens kernvullis, hierdie is net ’n paar, dis duidelik deel van ons bestaan. HOE DIT GEBEUR In Engels is daar twee woorde, “mistake” en “error”, die eerste word gewoonlik gebruik wanneer ’n keuse betrokke is, die tweede wanneer menslikheid intree. ’n Fout is selde moedswillig en kan gebeur as gevolg van moegheid, siekte, wanhoop, spanning of verwarring. Sosiale en korporatiewe stelsels is deesdae onbeskryflik ingewikkeld en mense doen wat hulle kan, maar wanneer hulle skielik buite hul perke of kennis moet optree, kan ’n geweldige ramp volg. En nie alles op aarde is verklaarbaar nie, dinge gebeur, hoe vreemd ook al, en moet soms aanvaar word. Daar is ook gevalle waar ’n fout broodnodig is, iemand is traag, agterlosig of arrogant en ’n groot fout lei tot die skok wat duidelikheid bring. WAT OM TE ONTHOU ’n Fout is ’n oomblik van konflik tussen ’n individu en sy werksituasie, familie, kultuur, agtergrond, sosiale kring of die onbekende. ’n Fout het meestal ’n aanloop, omstandighede wat nie betyds opgemerk word nie. In ’n tyd van inligting en tegnologie behoort ons minder foute te maak, maar die teenoorgestelde gebeur. Die druk van ’n knoppie kan ’n maatskappy vernietig, die aanstuur van ’n e-pos na die verkeerde persoon kan jou reputasie verwoes, alkohol by ’n werksfunksie kan ’n toekoms beskadig, slaggate is orals. En wanneer iemand ’n fout maak, word daar dikwels vergeet van alles wat die persoon wel al vermag of bygedra het. ’n Terugslag moet binne verband ondersoek word. Nie alles is dood en smart nie. WAT IS DIE GEVOLGE Mense verloor hulle posisies, verhoudings, families, beleggings, vertroue, selfvertroue. ’n Fout in die werkplek lei nie altyd tot werkloosheid nie, maar jou kanse tot vooruitgang word wel skraler. Sommige gebruik ’n fout tot hulle voordeel deur te wys dat hulle dapper is en ’n krisis onmiddellik kan ontlont. Deesdae maak maatskappye “beplande foute” deur hulle advertensies op verkeerde groepe te mik of twyfelagtige produkte te bemark. Hierdie tipe navorsing lewer verrassende resultate. Feit: Foute word dopgehou. WAT IS DIE AKSIE Erken die fout, vra om verskoning, dadelik. Moenie huil nie, dis grillerig. Vermy drama, dit mors tyd. Wees eerlik en praat daaroor. Neem verantwoordelikheid. Foute leer ons onsself ken en bring swakhede in ons huidige situasies na vore. Verlore siele het al ’n lewenspad gevind as gevolg van ’n groot fout of ongeluk. Duisende mense vind soms oplossings en hoop as gevolg van een persoon se misstap of ontsporing, lewens het lesse, omstandighede verbeter. My eie lewe het drasties verander nadat ek besluit het om aktief foute te probeer vermy. Ek maak lysies soos ’n besetene, ek werk binne ’n raamwerk, ek konsentreer, ek werk met ’n “timeline” en nie ’n “deadline” nie, sodoende het ek ’n beroep en ’n lewe. Ek weet nou eers – baaaaie laat in my lewe – dat woede, ongeduld en irritasie my grootste vyande is, geen besluite mag geneem word wanneer ek in so ’n toestand is nie.

Tragies, maar waar: ’n Lewe sonder mislukkings is ’n vaal affêre, ons moet eksperimenteer en soek na sukses, sonder foute haal min die reënboog!