Gee jou metabolisme skop
Werk jou metabolisme soos ’n goed geoliede masjien, is dit nie net makliker om jou gewig te handhaaf (of oortollige kilogramme af te skud) nie. Dit kan jou ook help om energiek te voel. Maak dié gewoontes deel van jou roetine
EET PROTEÏEN SOGGENS/ SMIDDAE
Jy weet jou aandete moet gehalteproteïen (maer vleis, eiers, vis, peule, kaas) insluit. Moeiliker om te onthou met ontbyt en middagete. Studies wys jou liggaam werk harder om kilojoules wat van proteïen afkomstig is, af te breek en te verwerk. Dit versnel jou metabolisme effens. Proteïen laat jou ook langer versadig voel.
KOOLHIDRATE VIR AANDETE
Die samestelling van jou aandete kan help om jou bloedsuikervlakke deur die nag te stabiliseer. Bloedsuiker en die gepaardgaande wisselende hormoonvlakke het ’n uitwerking op onder meer jou aptyt en energievlakke – en kan inmeng met jou liggaam se vermoë om vet te berg of te verbrand. Moenie net ’n slaai of proteïen eet nie. Kombineer dit met ’n klein porsie komplekse, onverfynde koolhidrate soos bruinrys, patat of peule. Oppas vir te laat eet – nie later as negeuur nie.
KRY GENOEG ZZZ . . .
Mense wat minder as 5 uur per nag slaap, is 30% meer geneig om gewig aan te sit as dié wat langer in droomland verkeer, wys ’n groot Amerikaanse studie oor 16 jaar. Genoeg slaap is belangrik om hormone te balanseer wat nodig is om jou eetlus en metabolisme te reguleer. Die meeste mense het 7-8 uur per nag nodig.
HOKAAI MET WERKSTRES
Stres is ongesond, ja. Maar veral werkstres is nadelig vir jou metabolisme. Vroue met meer stres gedurende die werkdag verbrand sowat 435 kj minder in reaksie op ’n hoërvet-maaltyd, volgens ’n studie met vroue met gemoedsteurings in die joernaal Biological Psychiatry. Stres kan die manier verander hoe jou liggaam vet en koolhidrate verbrand. En selfs die voordele van ’n gesonde maaltyd verminder, volgens ’n opvolgstudie.
BEWEEG . . .
As jy gewoonlik agter jou lessenaar geplant sit, staan op, gebruik ’n pedometer en loop soveel jy kan. Mik vir 15 000 tree per dag (sowat 11 km), volgens Britse navorsing. Maar elke bietjie help!