Natuurliken velsorg
Die natuur is ’n skatkis van bestanddele wat goed is vir jou welstand. Maar is meer natuurlike skoonheidsprodukte noodwendig beter vir jou vel?
’Ngesonde en omgewingsvriendelike leefstyl raak wêreldwyd al hoe gewilder. En hierdie tendens spoel oor na die skoonheidswêreld, sê Tea Višek, besturende direkteur van Nikel Cosmetics,’n reeks natuurlike velsorgprodukte. “Hierdie trend word groter en groter en verskeie bedrywe, ook die skoonheidsbedryf, gaan al hoe meer onder druk voel om die bestanddele vir hul produkte op ’n manier te verkry wat die planeet en die toekomstige generasies in ag neem.”
Verbruikers vandag is ingelig oor die soort produkte wat hulle daagliks op hul vel gebruik, sê Tea. “Jou vel is immers jou grootste orgaan, so dit maak sin dat mense daarna wil omsien.” En vir baie is meer natuurlike skoonheidsprodukte die antwoord.
’n Natuurlike produk bevat hoofsaaklik bestanddele wat in die natuur voorkom, met min of geen chemies-vervaardigde of sintetiese bestanddele nie.
Tea meen van die beste natuurlike bestanddele is natuurlike olies van hoë gehalte. “Nagblomolie ( evening primrose oil) is byvoorbeeld ’n goeie bevogtiger, terwyl galambotter in jou vel insmelt en ook anti-inflammatories is. Ander goeie bestanddele sluit in vitamien E (op verpakking dikwels aangedui as tocopherol) en jojoba- en sewejaartjieolie,” sê sy. Maar is natuurlike produkte beter? Daar is ’n klomp natuurlike bestanddele wat uitstekend werk, skryf die internasionale velsorgkenner Paula Begoun op haar webwerf, www. paulaschoice.com. Maar wees versigtig om te dink dit is die “beste” of “enigste” opsie. Natuurlike sowel as sintetiese bestanddele kan voordelig wees vir jou vel, maar net so kan albei jou vel mettertyd irriteer en verhinder om te herstel en vernuwe, skryf sy. Volgens Paula sluit natuurlike bestanddele wat goed werk, in: klei, heuning, kamille, borrie, aalwyn, galam- en kakaobotter, vitamien E en B3, jojoba-, klapper-, olyf-, argan- en nagblomolie asook groen- en wittee.
“Die regte natuurlike bestanddele is jou vel se vriend,” sê Tea, maar baie sintetiese bestanddele is ook veilig om te gebruik. Verskillende tipes velsorgprodukte werk vir verskillende mense en jy moet “luister” na jou vel. Dalk beteken dit dat jy ’n meer natuurlike produk met ander produkte moet kombineer vir die beste resultate.”