Kuberkuier: Mauritius
Lieflike weer, swem met dolfyne, lang wandelinge op die strand . . . Wie wil nie op Mauritius bly nie? Nicole Wannenburg vertel meer van hul verblyf
Waar op Mauritius bly julle?
Ons bly die afgelope jaar en ’n half op Flic-en-flac, ’n kusdorpie aan die westekant van die eiland. Dis so 15 km van die hoofstad Port Louis. Ons huur ’n drieslaapkamer-meenthuis met ’n swembad en ’n groentetuin so 1,5 km van die naaste strand. Die strand is omring deur casuarina- en palmbome en het ’n pragtige strandmeer wat deur die koraal beskerm word en waar dit veilig is om te swem.
Wat doen julle daar?
Ek is ’n gebore en getoë Pretorianer en het spraakterapie en oudiologie aan die Universiteit van Pretoria studeer. Tans werk ek as ’n eiendomsagent terwyl ek deeltyds besig is met my nagraadse onderwysdiploma deur Unisa.
My man, André, is ’n wêreldreisiger. Hy is gebore in Pretoria, was op laerskool op Swellendam, op hoërskool in Vancouver, Kanada, en het aan die University of the Sunshine Coast in Australië studeer. In Suid-afrika het hy twee keer aansoek gedoen om mediese keuring, maar omdat geen plaaslike universiteit in daardie stadium ’n B.-graad in biomediese wetenskappe aangebied het nie, wou niemand hom krediete daarvoor gee nie.
Hy het toe aansoek gedoen by die Universiteit van Mauritius, waar erkenning wel aan hom gegee is vir sy vorige graad. Die mediese skool hier is in vennootskap met die Universiteit van Genève in Switserland.
Grootste aanpassings?
Definitief die taal en verkeer. Hoewel Engels die amptelike taal en ook handelstaal is, oorheers Frans nog. Hier is byvoorbeeld nie een Engelse radiostasie op die eiland nie. Aanvanklik het ons gedink dat die Mauritiane soms bombasties, nors en kortaf voorkom, maar mettertyd het ons agtergekom dat dit net ’n kommunikasieprobleem is omdat hulle direk van Frans of Kreools na Engels vertaal.
Wanneer jy hier bestuur, voel dit asof jy in Indië is met die smal enkelpaadjies, hordes mense, ou voertuie en bromponies.
Hier is daagliks verkeersvertragings en jy hoop en bid maar net altyd dat jy nie agter ’n suikertrok beland nie. As ’n haastige Gautenger moet ek gereeld op my tande kners en meditasiemetodes toepas vir kalmte!
Mense praat gewoonlik van ’n kultuurskok wanneer hulle na ’n ander land verhuis, maar net soos SuidAfrika is Mauritius ’n baie diverse en multikulturele bevolking. Dit is ongelooflik hoe die inwoners, wat van ’n mengsel van Franse, Indiese, Kreoolse en Chinese afkoms is, in harmonie saamwoon en ’n gelukkige nasie is. Hulle het mekaar se maniere, geloof, taal, tradisies en nasionale kookkuns aanvaar en is ’n voorbeeld vir baie ander lande in die wêreld.
Hoe hanteer julle tropiese siklone?
Ons bly nou al ’n jaar en ’n half hier en het gelukkig nog nie een beleef nie. Dit is eintlik nie so algemeen hier soos mense dink nie, teenoor tropiese reënbuie wat veral tussen Januarie en Maart voorkom.
Hoe is die kos?
Die geregte bevat baie verskillende kruie en speserye en het unieke smake en geure. Die enigste kosadvies wat ek toeriste sal gee, is om alles eers te proe voordat jy ekstra rissie bysit!
Is dit duur om daar te bly?
Dit is duurder as wat ons aanvanklik verwag het. Mauritius is bekend vir die produksie van suiker, rum en klere, maar jy is baie beperk as dit kom by kos en drank. Die meeste produkte en goedere word ingevoer vanaf SuidAfrika, Frankryk, Indië en Australië, wat die pryse baie verhoog. Vars groente en vrugte is bitter duur en juis om dié rede het ons besluit om ons eie groentetuin te begin. Vleis is ook heelwat duurder as in Suid-afrika, maar hoender se prys is darem billik. Wat huur, water, elektrisiteit en die internet betref, is die pryse goedkoper as in Suid-afrika.
Hoekom dink jy is Mauritius so gewild onder toeriste?
Die subtropiese klimaat, wat afgekoel word deur die sagte seebriese vanaf die Indiese Oseaan, maak Mauritius ’n bestemming wat regdeur die jaar besoek kan word. Dis boonop net vier en ’n half uur per vliegtuig van Johannesburg en jy benodig nie ’n visum nie. Die eiland het pragtige en ongerepte strande, met talle aktiwiteite en watersporte om te geniet, soos gholf, visvang en snorkel. Dis die perfekte wegbreekplek vir paartjies of gesinne, waar ouers ’n blaaskans kry en kan ontspan terwyl die kinders pret het in ’n veilige omgewing.
Het julle al saam met dolfyne geswem?
Dit is een van die gewildste aktiwiteite op die eiland en ons is geseënd om gereeld saam met hulle te kan swem. Die twee soorte wat hier voorkom, is die bottelneus- en die toldolfyn. Hulle is baie mak, lyk sommer vriendelik en is kalm met mense rondom hulle. By Tamarinbaai aan die westekant van die eiland kan jy ’n boot of katamaran bespreek en is jy byna gewaarborg om elke keer saam met hulle te kan swem.
Hoe gereeld kom kuier familie en vriende vir julle?
Ons is bevoorreg om ’n lekker groot familie te hê wat reg oor die wêreld bly. Ons kry byna elke ses maande vriende of familie wat by ons kom kuier. Dit maak die verlang en gemis soveel makliker.