Lentehare: Krulbob tot karamelblond

Gesonde hare wat blink, ’n warm blonde haarkleur, golwende lokke, sexy opstyle en meer – dié somer se top-haartendense bied iets vir almal

Die laaste paar jaar se neiging na natuurlike, moeitelose velsorg en grimering spoel nou ook oor na hare. “Een van die grootste haartendense van die seisoen is hare wat glansend gesond is en minimale stilering nodig het om mooi te lyk,” volgens Karen Botha, bemarkingsbestuurder van die Brasiliaanse haarsorgreeks INOAR in Suid-afrika.

Pleks van oorgestileerde haarstyle wat baie volume en hittestilering verg, neem los hare met natuurlike tekstuur en hope glans nou die voortou, sê sy. “En dit raak toenemend belangrik vir vroue om hul hare met die regte haarsorg-produkte en behandelings te versorg sodat dit van nature mooi val en minder hittestilering en selfs kleur nodig het.”

Goed versorgde hare begin by die regte tuissorg. “Die

meeste SA vroue se hare het ’n tekort aan vog weens hittestilering en buitefaktore soos die son en weer. Gebruik daarom ’n goeie sjampoe, opknapper en haarmasker wat vog terugsit in jou hare. Selfs as jy fyn hare het wat maklik olierig word, is bevogtigende produkte noodsaaklik.” Buiten goeie tuissorg maak ’n gereelde haarbehandeling by ’n salon ook ’n reuse-verskil.“’n Haarbehandeling versterk jou hare met net die regte hoeveelheid proteïene en werk dieper in die haarskag om dit van binne gesond te maak. Dit verbeter kroeserigheid en maak jou hare meer hanteerbaar sodat dit nie nodig is om dit so gereeld uit te blaas of glad te stryk nie.”

Daar’s ’n magdom behandelings om uit te kies en jou haarstileerder kan die behandeling aanpas deur jou unieke haarkwessies in ag te neem.