Toe nou, bespreek daardie vakansie
Daar is waarskynlik duisend redes om nié geld op ’n eksotiese vakansie te bestee nie. Maar hier is een goeie rede hoekom jy moet oë toeknyp: Dis ’n belegging in jouself! Hier is ’n paar bestemmings waarvoor dit die moeite werd is om te spaar
Diseen van daardie “memes” wat elke nou en dan deur ’n guitige vriendin op Facebook gedeel word. Op die foto sit-lê ’n bejaarde egpaar oopmond en snork . . . in ’n gondel van alle plekke, terwyl die fabelagtige Venesië ongesiens by die twee slapers verbygaan. Die trefreël by die foto: “Dís die rede hoekom jy nie jou reise tot jou aftrede moet uitstel nie.”
Ons weet. Dis skoolgeld en tolgeld en munisipale belasting en deesdae selfs ’n waterbelasting. En dan moet brood en botter nog op die tafel. Geld moet deesdae rek soos nog selde in die verlede, maar die cliché is waar . . . Reis is die enigste ding waarop jy geld kan bestee wat jou ryker sal maak. Hier is ’n paar bestemmings wat jy gerus op jou emmerskoplys kan sit.
stap pelgrims net die laaste paar honderd kilometer deur Italië tot by die Vatikaan in Rome. Waar ’n kwartmiljoen pelgrims jaarliks die Camino in Spanje voltooi, stap net sowat 2 500 pelgrims die Via Francigena, dus is dit minder gekommersialiseer. Die roete neem jou deur pragtige Toskaanse dorpies waar niemand Engels praat nie, en waar ’n luidrugtige Italianer vir jou handgemaakte pasta met vars artisjokke en aspersies voorsit. Oe! Die huiswyn is heerlik! En jy mag maar weglê sonder skuldgevoelens, want jy het mos hééldag gestap?
Machu Picchu, Peru
Soek op Google die gewildste staproete ter wêreld, en Google sal jou in ’n millisekonde na die Inka-wandelpad in Peru stuur. Dié roete neem jou oor vier dae na die antieke Machu Picchu bo die Urubamba-rivier. Sedert 2001 mag jy nie meer die roete onbegeleid stap nie, wat jou dwing om deur ’n agentskap te bespreek. Hier in Suid-afrika kan jy by Pentravel aanklop. As jy nie lus het vir stap nie, kan jy ook per trein reis tot by Machu Picchu. >