HERTZOGGIETERT
(bl. 104) As dit by hertzoggies kom, kan ek nooit net een eet nie. Kombineer dit met ’n suurlemoen-meringuetert en jy het soet en suur in een hap! genoeg vir 1
KORS 155 g (170 ml) botter, in blokkies gesny 280 g (500 ml) koekmeel, plus ekstra vir uitrol 45 ml versiersuiker koue water 250 ml gladde appelkooskonfyt
VULSEL 200 ml vars suurlemoensap 4 eiers 2 eiers, geskei 200 g (250 ml) suiker 250 g (270 ml) koue botter, in blokkies gesny 120 g (150 ml) strooisuiker 150 g fyn klapper
Plaas botter, meel en versiersuiker in voedselverwerker en pols by hoë spoed tot fyn krummeltekstuur. Gooi terwyl die verwerker loop geleidelik water by tot alles in een bal saamkom – sowat 40 ml. Vorm deeg in bal en laat rus in yskas vir 20 minute. Verhit oond tot 180 °C. Sprinkel meel op werkvlak en rol deeg uit in sirkel van so 3 mm dik. Spuit 20 cm-losboom-koekpan met kleefwerende kossproei. Voer pan uit met deeg. Voer dan rou tertkors met bakpapier uit en vul met rou rys of bone. Bak vir 10 minute. Verwyder rys of bone en bak nog 5 minute of tot kors goudbruin is. Laat afkoel. Smelt konfyt in mikrogolfoond en gooi in gebakte kors. Laat afkoel terwyl jy vulsel maak: Plaas sap, eiers, eiergele en suiker in middelslag-pot. Hou skoon mengbak naby. Plaas pot oor lae hitte op plaat terwyl jy met draadklitser roer. Hou aan roer tot die mengsel verdik, maar moenie dit laat kook nie. Sodra een of twee borrels vorm, verwyder dadelik van plaat en gooi in die skoon bak. Meng met staafmenger terwyl jy botter bietjies-bietjies byvoeg. Gooi mengsel in kors en plaas in yskas vir 2-3 uur om te stol. Verhit jou oond se roosterelement tot rooiwarm. Klits eierwitte wat jy eenkant gehou het tot sagte punte vorm. Voeg strooisuiker geleidelik by en hou aan klits tot blink en styf. Vou klapper in. Skep mengsel in spuitsak met rosettuit en spuit rosette op gestolde tert. Plaas vir paar sekondes onder roosterelement tot goudbruin. Lig uit pan en plaas op opdienbord. Sit voor met ekstra konfyt.