SOETKOEKIE-VLATERT
(bl. 105) Ken jy ’n Jode-tert? Dis ’n 7-lae-lekkerte met ’n soet vlavulsel tussenin. Ons kombineer dit met die speserygeure van soetkoekies. genoeg vir 1 tert
KORS 250 g (270 ml) sagte botter 320 g (570 ml) koekmeel, plus ekstra vir uitrol 240 g (285 ml) strooisuiker 10 ml bakpoeier 1 ml sout 3 ml fyn naeltjies 5 ml kaneel 3 ml fyn gemmer 30 ml soetwyn soos hanepoot 1 eier, geklits
VULSEL 80 g (140 ml) koekmeel 250 g (295 ml) strooisuiker 4 eiergele 5 ml vanieljegeursel 1 liter melk
Kors Verhit oond tot 180 °C. Plaas botter, meel, suiker, bakpoeier, sout, speserye en wyn in voedselverwerker en pols by hoë spoed tot gemeng. Voeg eier by terwyl menger loop en meng tot ’n deegbal vorm. Plaas vir 20 minute in yskas. Verdeel deeg in 7 ewe groot stukke. Spuit 8 velle bakpapier van so 20 x 20 cm goed met kleefwerende kossproei. Plaas een deegbal op ’n vel papier en besprinkel goed met meel. Plaas nog ’n vel bakpapier bo-op en rol uit tot 5 mm dik. Verwyder boonste vel en plaas vel met deeg op bakplaat. Bak vir 8-10 minute of tot goudbruin. Herhaal met res van deeg. Vulsel Klits meel, suiker, eiergele en vanielje saam in mengbak. Bring melk tot kookpunt en gooi oor eiergeelmengsel terwyl jy roer. Gooi mengsel terug in pot en roer met draadklitser oor lae hitte tot mengsel verdik soos witsous. Laat kook vir 5 minute tot gaar. Plaas kleefplastiek direk op gaar mengsel en laat afkoel tot koud. Verwyder kleefplastiek en skep mengsel in spuitsak met 1 cm-tuit. Plaas eerste koekie op bord, spuit vulsel in spiraal bo-op, gevolg deur tweede koekie. Herhaal tot al die sirkels en vulsel op is. Sif versiersuiker oor en sit voor met bessies van jou keuse.