Geur en emosie
LAMSBLAD MET LEMOENBLOEISEL-BRUINSOUS
Jou reuksin is jou kragtigste sintuig. Dis dus geen wonder dat geur en emosie so nou verbind is nie. Deur jou gunsteling-parfuum aan te wend versterk jy jou gemoed en verklap jy iets van jouself sonder om ’n woord te sê. Die meeste vroue kies daarom parfuums wat by hul styl, persoonlikheid of ’n spesifieke geleentheid pas. Blomgeure soos roos en jasmyn laat jou voel of jy pas ’n vars bos blomme as geskenk gekry het. Sitrus is verfrissend en laat jou sonnig en optimisties voel. Kosgeure soos gemmer, swartpeper en tonkaboontjie (coumarou) laat jou mond water.
(bl. 95) Ek gebruik moskonfyt om die lamsblad te rooster in die oond; dit gee die lam ekstra lekker smaak. Jy kan die moskonfyt vervang met heuning.
genoeg vir 10 2 uie, in skywe gesny 1 knoffelbol, oorlangs gehalveer 1,5 kg lamsblad aan die been 1 x 410 g-blik tamatiepuree 1 x 410 g-blik gekapte tamaties 250 ml moskonfyt 30 ml heel vinkelsaad 20 ml heel komynsaad 500 ml beesaftreksel sout en varsgemaalde swartpeper 20 ml lemoenbloeiselwater
Verhit oond tot 200 °C. Pak uie en knoffelhelftes in oondroosterbak. Plaas lamsblad met vetkant na bo op uie. Gebruik ’n skerp mes en maak diep kepe so 1 cm van mekaar in die vet. Meng puree, gekapte tamaties, moskonfyt, vinkel, komyn en aftreksel saam. Geur vleis met sout en peper en gooi tamatiemengsel oor vleis. Maak oondroosterbak met deksel of aluminiumfoelie toe. Rooster 2 uur. Maak bak oop en rooster nog 30 minute of tot goudbruin. Haal uit oond. Gooi pansous deur ’n sif. Druk die knoffel en uie ook deur die sif – daar kom baie geur uit. Voeg lemoenbloeiselwater by sous en meng deur. Plaas vleis op opdienbord en skep sous oor. Sit voor.