Dís die top-behandelings vir gesig en lyf (sonder die mes)
Die vakansieseisoen is om die draai en jy wil jou lyf en gesig somergereed kry. Met estetiese behandelings kan jy vinnige, sigbare resultate kry sonder chirurgie
In’n wêreld waar ons smag na kitsbevrediging, is dit geen verrassing dat estetiese skoonheid ’n florerende bedryf in Suid-afrika is nie.
“Die grootste aantrekkingskrag is die vinnige, sigbare resultate wat meer gevorderde estetiese behandelings lewer, sonder dat dit nodig is om onder die mes te gaan,” sê Yolandé Swanepoel, programhoof van estetiese dermatologie by die Isa Carstens Akademie, SA se voorste opleier van skoonheid s terapeute.
Vroue van alle ouderdomme klop by die Isa Carstens Wellness Sanctuary-salonne in Stellenbosch en Pretoria aan vir enigiets van chemiese afskilfering om van akneemerke en pigmentasie ontslae te raak tot radiofrekwensie vir ’n fermer vel. Waar goeie velsorgprodukte nodig is om ’n gesonde vel te onderhou, werk estetiese behandelings dieper en meer omvattend om jou vel se bloedsirkulasie te bevorder, selvernuwing aan te help en die vervaardiging van kollageen te stimuleer, verduidelik Yolandé.
“As jy dié prosesse gereeld ’n hupstoot gee, kan dit ’n reuse-verskil maak aan hoe tekens van veroudering weens buitefaktore [soos sonb lootstelling, stres en dieet] later op jou vel wys.”
Of jy ’n nuweling is wat die wêreld van estetiese behandelings vir die eerste keer betree of ’n ervare kliënt op soek na ’n nuwe behandeling om uit te toets, dié ses is tans gewild in SA.
HOEKOM ’N TOP-BEHANDELING? Volgens dr. Nicole Kanaris, ’n estetiese dokter van die kliniek Medaesthetique in Johannesburg, maak baie plaaslike bekendes staat op ’n Green Peel om vars en stralend te lyk vir groot geleenthede. Dis vinnig met byna geen hersteltyd nie en kan in jou etensuur gedoen word.