Slaap jy kaal? Dis goed vir jou!
Al waarmee sy in die bed klim, is met ’n paar druppels Chanel No. 5 aan haar lyf, lui die beroemde woorde van Marilyn Monroe. Dalk het sy iets oor die wetenskap van kaal slaap en die gesondheidsvoordele daarvan geweet . . .
SOETE SLAAP
Volgens Nederlandse navorsers moet jy jou veltemperatuur verlaag vir ’n goeie nagrus. Jy is dan minder geneig om deur die nag wakker te word. As jy gereeld jou beddegoed afskop omdat jy te warm kry, los die nagklere.
VERJONGINGSKUUR
Dis moeilik om in ’n warm vertrek (bo 21 °C) te slaap. Volgens naturopate werp die hitte ook die vrystelling van teenverouderingshormone omver. Veral die menslike groeihormone (HGH), wat jou selle, ook jou vel en hare s’n, herstel.
MEER INTIMITEIT
Vel-teen-vel-kontak met jou maat stel oksitosien, die “bindingshormoon”, vry. Van die grootste voordele is dat dit stres en depressie verminder, bloeddruk verlaag en jou ook lekker laat slaap. Jy sal ook veel nader aan jou bedmaat voel.
GLOEIENDE VEL
Sweet wat in jou nagklere vasgevang word, skep ’n warm, vogtige omgewing, ’n broeiplek vir gis-infeksie en bakterieë. Slaap jy sonder klere kan dit verligting help bring vir velprobleme soos ekseem of psoriase.
KRY LUG DAARONDER
Uitgelewer aan stywe onderklere, sweterige oefensessies en altyd kuis bedek . . . laat jou intieme dele so nou en dan asemhaal. En wat is ’n beter tyd as wanneer jy slaap?