Die A-Z van TB

Sý het tuberkulose gehad, het Mej. SA, Tamaryn Green, onlangs aangekondig. Want hoewel ons daaraan dink as ’n siekte vir armes, eerbiedig dit geen grense nie

Green, Mej. Suid-afrika en onlangs eerste prinses in die Mej. Heelalwedstryd, het opnuut in SA die kollig op tuberkulose (TB) laat val met haar aankondiging dat sy as mediese student aan die Universiteit van Kaapstad die siekte gekry het.

Hoewel sy reeds in 2015 TB gehad het, het sy eers verlede jaar nadat sy in haar sesde jaar van studie as Mej. SA gekroon is, openlik daaroor begin praat. Haar stilswye was weens die stigma wat aan die siekte kleef. Dit het die proses van diagnose en behandeling moeiliker en meer traumaties gemaak, het sy op ’n mediakonferensie gesê. “TB is een van die toptien-oorsake van dood wêreldwyd en as my ervaring kan help om die voorkoms daarvan te verminder, sal ek baie gelukkig wees.”

Wetenskaplikes aan die Universiteit Stellenbosch het met internasionale navorsers saamgespan om ’n eenvoudige bloedtoets te ontwikkel wat kan voorspel wie die hoogste risiko het om TB te ontwikkel. Volgens prof. Walzl kan jy dan voorkomende behandeling ontvang voor die siekte aktief word. Dit het veertien jaar geduur om ’n formule te vind wat werk. Dormante TB word met dieselfde soort antibiotika as aktiewe TB behandel, maar dis minder pille vir ’n korter tyd. (Sowat twaalf weke teenoor aktiewe TB se ses maande.) Die bloedtoets is nog nie gereed vir gebruik nie en ondergaan verdere kliniese toetse. Hulle werk ook aan ’n bloedtoets vir aktiewe TB, sê hy. “Dis in ’n ontwikkelingsfase, maar so ’n strokietoets (soortgelyk aan ’n bloedsuikertoets) kan dalk binne vyf jaar beskikbaar wees.”