oor sjokolade 10 dinge wat jy dalk nie geweet het nie . . .

1 Die woord sjokolade is afgelei van die Asteekse woord “xocolatl”, wat “bitter water” beteken.

2 Jy het sowat 100 kakaobone nodig om 100 g sjokolade te maak.

3 Die saadpeul van die kakaoboom was inspirasie vir die vorm van die Coca-cola-bottel.

4 Wetenskaplikes het al probeer uitvind waarom dit lyk asof die mensdom se sjokoladelus onblusbaar is. Dr. Bankole Johnson, ’n kenner op die gebied van verslawing aan die Universiteit van Texas in die VSA, sê sjokolade is ’n natuurlike antidepressant en bevat verskeie verbindings wat die brein se plesiersentrum stimuleer. Maar, bygesê, dit kom in bitter klein dosisse voor. Annmarie Kostyk, ’n Kanadese sjokoladekenner, glo weer ons “verslawing” is daarin geleë dat sjokolade deur die meeste mense as trooskos beskou word – dít waarna ons smag as ons nie lekker voel nie.

5 Die Switsers eet die meeste sjokolade per jaar (byna 8,8 kg per persoon), gevolg deur die Duitsers.

6

Twee uit elke vyf Britte erken hulle is sjokoliste – en dat hulle vir ontbyt, middagete én aandete ’n stukkie sjokolade geniet. Sarie-lesers is ewe gek na sjokolade.

7 Sowat 70% van alle kakaobone word in Afrika gekweek, al is die boom nie inheems aan dié vasteland nie. Die kakaoboom ( Theobroma cacao – “theobroma” beteken “kos van die gode”) kom uit Suid- en Sentraal-amerika.

8 Sjokolade smelt in jou mond omdat die smeltpunt van kakaobotter 35,5 °C is – net laer as liggaamstemperatuur.

9

Sjokolade is skadelik vir honde omdat dit die stimulant teobromien bevat wat die sentrale senuweestelsel en hartspiere van honde kan vergiftig.

10 Sowat 40% van alle vroue en 15% van mans smag gereeld na sjokolade, en omtrent ’n miljard mense bederf hulself elke dag daarmee.