Dit maak my opgewonde om vroue te sien blom
ESNA COLYN, hoof van Imbalie Beauty
Toe Esna Colyn tien jaar gelede oorgeneem het as uitvoerende hoof van die trots Suid-Afrikaanse skoonheidsmaatskappy Imbalie Beauty, was sy lus vir die uitdaging en gefassineer deur skoonheidsprodukte – reeds vandat sy in 1985 as au pair in Parys gewerk het. Maar sy het nooit kon dink dat sy hier sou ontdek wat haar werklik gelukkig maak nie: om vroue te laat groei.
“Dit maak my só opgewonde om vroue te sien blom as hulle uit hul gemaksone gedruk word. Om te ervaar hoe ons die beste in mekaar uitbring. Jy kan nooit op jou eie jou roeping vervul nie, dit het ek op die harde manier geleer,” sê sy.
Sy is nou verál dankbaar vir die “spesiale span” vroue om haar. Die grendeltyd het skoonheidsalonne hard getref – met druktyd het salonne maar kort tevore weer oopgemaak. (Imbalie het Placecol-, Dreamnails- en Perfect10salonne landwyd.)
Tipies Esna het sy dadelik op die positiewe gefokus. Sy is al so van studentedae af – “met Esna is daar altyd nog ’n geldjie”, het haar pêlle gespot. “Nou gebruik ons die tyd om ons besigheid fyn te bekyk vir gebreke en om personeel nuwe vaardighede te leer.”
Placecol-stigter Elma McKenzie moes in die beginjare in 1980 produkte in ’n oorlogsgeteisterde Rwanda kry, fakse na die Himalajas stuur vir rou bestanddele . . . Haar ervarings plaas jou probleme in perspektief, dan druk jy weer deur, sê Esna.
As kind kon sy al vasbyt. Sy was mededingend en nie ’n natuurlike atleet nie, maar vir langafstande kon jy óéfen. Sy het alles ingesit. “Ek het selfs in graad elf teen Zola Budd gehardloop en geglo ek gaan wen! My pa, ’n weermagman, het my van roetine en orde geleer, beginsels wat belangrik is, wat jy ook al aanpak.”
Ná haar jaar in Parys het Esna haar as geoktrooieerde rekenmeester bekwaam en haar stempel in die bankwese en finansiële sektor afgedruk, hoewel sy haarself nie as ’n tipiese syfermens beskou nie.
“Ek is eerder ’n entrepreneur. Dis lekker om innoverende goed te doen, maar dit moet outentiek en volhoubaar wees. Ons uitgangspunt is nou holisties – ons fokus op algehele welstand – skoonheid, gesondheid, voeding . . .”
As sakevrou en ma van twee is balans moontlik danksy haar ondersteuningsnetwerk en “’n wonderlike man” met wie sy al dertig jaar getroud is. “Hy laat my toe om ’n vrye gees te wees en die dinge te doen wat my gelukkig maak.”