Kykers moo!
Vars, oop en wakker . . . . Jou oë vertel ’n storie. Twee plaaslike grimeerkunstenaars deel hul wenke om ooggrimering te bemeester
#1 WEG MET LYNTJIES
Dis belangrik om die deel om jou oë goed te bevog met ’n oogroom, sê Kelly Paitaki, plaaslike grimeerkunstenaar van Chanel. Dit plomp fyn lyntjies op sodat dit sagter vertoon en keer dat grimering aangeplak lyk. (Sien bl. 87 vir oogrome.)
#2 ’N BASISLAAG VIR HOUKRAG
“Jou ooglid is die olierigste deel van jou vel, daarom moet jy dié deel goed voorberei voordat jy oogskadu aanwend,” sê Alicia Buckle, grimeerkunstenaar en haarstileerder van Kaapstad. Wend vooraf ’n basislaag wat spesiaal vir oë geformuleer is, op jou ooglede aan. Dit sal help dat jou oogskadu langer aanbly en dat die oogskadukleur sterker vertoon.
#3 LIPSTIFFIE VIR DONKER KRINGE
Het jy geweet? ’n Dun lagie van ’n mat lipstiffie met ’n oranje of perske ondertoon kan help om donker kringe onder jou oë te neutraliseer, sê Alicia. Gebruik daarna ’n verligterpen met ligweerkaatsende deeltjies om die deel te verhelder.
#4 VERBRONSER VIR DEFINISIE
Wend ’n romerige verbronser in die vou van jou oog aan en skakeer dit met jou onderlaagborsel in. “Dit warm jou vel op en laat jou gesond lyk. Dit definieer ook jou oë en laat dit wakkerder lyk,” sê Alicia.
#5 WELIGE WENKBROUE
Goedversorgde wenkbroue raam jou gesig en rond jou voorkoms af. Kies ’n veeldoelige produk wat jou wenkbroue welig, donsig én dikker laat lyk.
#6 GEHEIM VIR LANGER WIMPERS
“’n Wimperkrultangetjie maak waarlik ’n groot verskil,” benadruk Kelly. Maak seker jy krul jou wimpers so na as moontlik aan die haarwortels. Wend ook jou maskara teenaan die wortels aan om seker te maak elke haartjie word mooi bedek.
#7 SPEEL MET OOGOMLYNER
Kies vir die dag ’n bruin oogpotlood of speel met ’n helder skakering soos blou. Trek op jou boonste wimperlyn ’n dun lyn wat effens dikker na die buitehoeke van jou oë loop. Verleng die lyntjie effens verby die buitehoek om jou oë te “lig”. “Skakeer dan die lyntjie liggies met ’n oogskadugrimeerborsel vir ’n sagter, natuurliker voorkoms, of hou dit ’n soliede lyn vir meer trefkrag,” stel
Kelly voor.
#8 GROTER OË
Skep die illusie van groter oë deur oogskaduskakerings soos bruin, pers of grys met ’n mat afwerking in die buitenste hoek van jou oogvou aan te wend. “Wanneer jy ’n skaduwee in jou oogvou skep, trek jy die oog ‘oper’,” sê Alicia.