EWAN STRYDOM
Met die beëindiging van die inperkingsmaatreëls kon een van Ewan se droomprojekte uiteindelik afskop. En hy glimlag van oor tot oor wanneer hy daaroor gesels. “Ek is in November 2019 al gevra om ’n oudisie af te lê om ’n nuwe kykNETprogram, Plaasjapie, aan te bied – ’n werklikheidsreeks waar stadsmense vir ’n maand op ’n plaas gaan leef en werk. Ek wou nog altyd ’n program alleen aanbied en ek sien myself ook as ’n plaasjapie wat op ’n plot buite Johannesburg grootgeword het. En toe kry ek die werk! Ek het gedink hier is dit nou, wat ’n lekker geleentheid. En net ná ons die inskrywingsproses vir deelnemers begin uitsaai het, het die eerste inperking gekom.”
Die span het vier keer oor die afgelope twee jaar probeer om die projek weer op die been te bring, net vir ’n nuwe Covid-vlaag om alles te kelder. “Later het ek vrede gemaak dat wat moet gebeur, sal gebeur. Dit was uitputtend om aanhoudend opgewonde te word en jouself gereed te maak, net om weer teleurgestel te word.”
In Maart vanjaar het die span uiteindelik op ’n plaas aan die Weskus met opnames begin. Plaasjapie word sedert Julie uitgesaai en Ewan is weer druk besig. Hy bied daagliks die middageteprogram op Smile FM aan, hy’s ’n aanbieder op kykNET se Bravo! en die seremoniemeester-versoeke stroom weer in.
Die prentjie lyk baie anders as in 2020. “Ek gaan nie jok nie, dit was vir my baie lekker om daardie eerste paar weke van inperking saam met my vrou, Adrienn, en twee seuns, Dominic en Kean, te kon deurbring. Ons het heerlik houtwerk gedoen, tuingemaak en trampolien gespring. Maar in jou agterkop stres jy ook. Ek het toe net ’n paar maande tevore van Expresso op SABC3, waar ek nege jaar lank vyf dae ’n week drie uur per dag op die lug was, geskuif na Bravo!, ’n halfuur lange program een keer per week, sodat ek meer tyd saam met my gesin kon deurbring. Dit was ’n baie moeilike sprong om te maak, en toe word Bravo! vir ’n ruk gestaak. Geleenthede waar ek die seremoniemeester sou wees, is een ná die ander gekanselleer.”
Sy vrou, ’n fotograaf, het ook ophou werk. “Ons het die verantwoordelike ding gedoen en van Covid-hulpprogramme gebruik gemaak, soos om minder op ons huislening af te betaal. Ek is net dankbaar my radiowerk kon aangaan, want dit was van die begin af as ’n noodsaaklike diens geklassifiseer.”
Hy het besef hy moet ’n plan maak. “Ek het gesoek na nuwe geleenthede en vaardighede om aan te leer en is opgelei as eiendomsagent. Dit was interessant en ek het selfs ’n huis verkoop as assistent-agent! Maar toe televisiewerk weer begin, was dit te moeilik om by alles uit te kom.”
Daardie tyd het hom ’n nuwe uitkyk op finansies gegee. “Dit het my geleer om nie so daaroor te stres nie. Dit is belangrik, ja, maar dit is nie alles nie. Gesondheid, tyd saam met jou geliefdes en om die lewe saam te geniet is baie belangriker. Jy moet jouself herinner jy is goed in jou werk wanneer dit sleg gaan, ook dat dinge weer sal optel. As jy fokus op geld en hoeveel elke projek betaal eerder as op jou vermoëns en passies, gaan jy probleme hê. Soms weet ek nie hoe ek dit deur party maande gemaak het tydens die inperking nie, maar ek het. ’n Mens moet positief en oopkop bly, want dit is ál hoe jy in staat sal wees om nuwe geleenthede aan te gryp.”
Nou kyk Ewan vorentoe. “Vanjaar is vir my ’n full circleoomblik omdat Bravo! tien jaar oud is en die produksiehuis șvan Bravo!ț Homebrew Films vir my my eerste werk as aanbieder by All Access op M-Net gegee het in 2008. Ek kan nie glo Bravo! is al so lank op die lug nie. Dit vaar so goed en het ’n ongelooflike sterk produksiespan. Ek onthou nog baie goed die eerste onderhoud wat ek in suiwer Afrikaans moes voer nadat ek nog altyd net in Engels gewerk het. Dit was met aktrise Christia Visser en die sweet het my behoorlik afgetap. Ek was so op my senuwees!
“Nou is dit vir my so lekker om in Afrikaans te kan werk en met Afrikaanse mense te kan kuier op stel. Die program slaan ’n nuwe blaadjie om en lyk nóg meer spoggerig, en ek sien uit na die volgende tien jaar!”