3 VIER SAAM TUINDAG
Op 15 Oktober is dit weer tyd vir Suid-Afrika se grootste tuinparty, en almal is genooi! Maak nie saak hoe groot of klein jou tuin is nie – bêre net jou gereedskap vir die dag.
Tuindag is die ideale geleentheid om daardie stukkie groen in jou lewe te geniet. As jy iets waardeer en liefhet, moet jy dit vier, sê TVpersoonlikheid en 2023-Tuindagvriend Marciel Hopkins.
Haar tuintjie gee vir haar groot vreugde. “Ek geniet die kalm ruimte wat dit my bied. Ná ’n besige week is dit ’n wonderlike plek om af te skakel en te ontspan. Ek en my man hou ook graag piekniek in die Kirstenbosch Nasionale Botaniese Tuin naby ons. Ons waardeer dit om na aan die aarde te leef,” sê sy.
Daardie konneksie met die natuur is eintlik deel van ons DNS. Omgewingskenner prof. Jules Pretty van die Universiteit van Essex beraam dat die mens vir 350 000 generasies baie na aan die natuur geleef het. Ons bly maar nog net vir ses generasies in die stad.
Navorsing wys as jy dikwels met plante doenig is, het jy oor die algemeen ’n meer positiewe lewensuitkyk en is minder gestres. Jy voel kalmer, meer vreedsaam en gelukkiger. Selfs om in die grond te vroetel is goed vir jou. Navorsing deur die neurowetenskaplike Christopher Lowry dui boonop daarop dat ’n familie bakterieë (Mycobacterium vaccae) wat in die grond leef, jou vlakke van die goedvoelhormoon serotonien kan verhoog.
Tuinmaak is ook ’n ideale manier om meer bewustelik te wees. Hiervan kan Smile FM-aanbieder en geesdriftige tuinier Angel Campey getuig: “Wanneer jy tuinmaak, fokus jy op een ding op ’n slag. Jou gedagtes raak stil. Ek weet plante suiwer die lug, maar ek is oortuig daarvan hulle suiwer ook ons gedagtes. Die son en suurstof is goed vir ons liggaam en die plante vir ons siel. Dit lig jou gemoed. Het jy al ooit hartseer gebly as ’n vrolike ry gesiggies vir jou glimlag?”
Al het jy net één plant, is jy amptelik ’n tuinier, en daarom vra die Tuindag-organiseerders dat absoluut almal vanjaar dié dag sal vier. Groot, klein, oordadig, eenvoudig . . . doen dit nes jy wil. Deel gerus jou viering op sosiale media met die hutsmerk #GardenDaySA, of via
WhatsApp by
066 389 5182.