Sagte VAARDIGHEDE

Sagte vaardighede kan (nog) nie deur tegnologie nagemaak word nie.

Sogenaamde sagte vaardighede is die sambreelterm vir ’n magdom dinge in die werkplek om die mense om jou te bemagtig – en dus tot voordeel van jou werkgewer te strek. Die lys is lank: mentorskap, kliëntediens, kommunikasievaardighede, spanwerk, emosionele intelligensie, tydsbestuur, analitiese denke, probleemoplossing, fasilitering, goeie organisasievermoë, menseverhoudinge . . . (enhancv.com)

Tegnologiereuse soos Google in Silicon Valley in Kalifornië beklemtoon juis die belangrikheid van dié vaardighede in die werkplek, sê Marie-Luce.

In Project Oxygen, ’n peiling onder werknemers, het Google in 2008 reeds bevind sagte vaardighede weeg swaarder as tegniese vaardighede wanneer dit by goeie bestuur kom. Die sewe top-eienskappe van goeie bestuurders by dié maatskappy is: hulle is goeie mentors; bemagtig die span en mikrobestuur nie; vestig ’n inklusiewe omgewing en is besorgd oor jou sukses en welstand; is produktief en resultaatgeoriënteerd; goeie kommunikeerder, luister en deel inligting; ondersteun jou in jou loopbaanontwikkeling en bespreek jou vordering; en duidelike visie en strategie. Eers dan kom tegniese vaardigheid. (rework.withgoogle.com/blog/)

In Project Aristotle, in 2012, het Google weer eens bevind die sleutel-elemente van hul topspanne is sagte vaardighede soos emosionele veiligheid, betroubaarheid, struktuur (nie te rigied nie), persoonlike bevrediging en om ’n verskil te maak. (techtarget.com)

Sagte vaardighede raak toenemend belangrik soos digitale tegnologie ’n al hoe groter rol in ons lewe speel, reken Marie-Luce.

“Dit behels dat ons vinnig kan aanpas, dikwels ingewikkelde idees konseptualiseer en uitvoer.” Dit gaan oor multitasking. “Dít gee ons ’n mededingende voordeel bó rekenaars.”

Ander sagte vaardighede waarvan ons nie moet vergeet nie, is deursettingsvermoë, interpersoonlike verhoudings, motivering, en die behoefte om jouself uit te daag en te bly leer, sê sy.

Niemand weet wat die toekoms inhou nie. Die Britse futuris en skrywer Ray Hammond se voorspellings vir 2040 laat my hare rys: romanses met robotte, motors wat hulself bestuur, ’n bevolking van nege miljard . . . (nypost.com)

Maar soos die Romeinse keiser Marcus Aurelius, wat van 121 tot 180 n.C. geleef het, filosofies gesê het: “Moet nie dat die toekoms jou ontstel nie. Jy sal dit ontmoet, as jy moet, met dieselfde wapens en logika wat jou toerus vir die hede.”