Lang gewag vir eienaarskap verby
HEIDELBERG Die lang gewag vir hul transportaktes as bewys van eienaarskap is uiteindelik vir 201 van die oorspronklike 250 begunstigdes van die eerste fase van die Diepkloof Behuisingsskema verby.
Die begunstigdes is Maandagoggend 26 Junie in die Duivenhoks Gemeenskapsaal deur Grant Riddles (uitvoerende burgemeester: Hessequa Munisipaliteit) toegespreek voor hul aktes aan hulle oorhandig is. Die verrigtinge is ook deur Thomas Pretorius (wyksraadslid), Margaret Jakobs (portefeulje voorsitter), asook raadslede Annemarie Joubert, Simon Odendaal en Jennifer Hartnick bygewoon.
Die aanwesiges is deur Chris Onrust (direkteur: Gemeenskapsdienste) en Hermanus Michaels (behuisingsbeampte) en hul span bygestaan. Michaels het kortliks die belangrike aspekte van die Behuisings Verbruikers Opleidingssessie uitgewys. Dit behels die waarde van hul titelaktes en die belangrikheid om ’n testament te laat opstel.
Riddles en Jakobs het die opgewonde begunstigdes gelukgewens, maar hulle ook gemaan om die waardevolle dokument soos goud te bewaar. “Moenie onnodige lenings, allerlei kits geldmaakskemas of beleggings aangaan sonder om deeglik navorsing te doen nie.”
Jakobs het ook gewaarsku om nie borg te staan vir vriende en familie nie. “Jou huis is jou belegging vir jouself en jou kinders.”
Volgens Onrust beoog hulle om so gou moontlik die oorblywende begunstigdes se aktes aan hulle te besorg.