Ons kyk terug op kwartaal twee
In ‘n vorige skrywe was daar nog twyfel oor die Franse verkiesing en Amerika en NoordKorea se dreigemente teenoor mekaar. Die Franse verkiesing het goed uitgedraai vir Europa, met Duitsland wat sekerlik ’n groot sug van verligting gegee het omdat ’n AntiEuropese Unie kandidaat nie geseëvier het nie. Amerika en Noord-Korea se dreigemente het bedaar, maar Kim Jong-un se honger na lang afstand wapens het nie. Nog dreigemente in die toekoms word verwag.
In Suid-Afrika is die gewone voor verkiesing (ANC president) moddergooiery aan die gang. Ongewone en onverantwoordelike uitsprake word gemaak deur politieke leiers wat onstabiliteit en onsekerheid by plaaslike en internasionale beleggers kweek. Dit is tot nadeel van elke landsburger en die doel is om die aandag van ons regering se onderprestasie af te haal.
Kyk deur die politiekery en jy sien ’n land wat offisiëel sedert 6 Junie ’n resessie beleef. Dit het egter lankal begin en het goed wortelgeskiet in die fondament van ons ekonomie. Die waarskuwings was daar en sakelui het dit uitgewys. Die regering het niks gedoen nie en die gevolg is dat meeste Suid-Afrikaanse maatskappye in die buiteland uitgebrei het, eerder as om in ons land te investeer. Die fokus op buitelandse investering is die laaste drie jaar op meeste maatskappye se agenda en het tot lae indiensname in Suid-Afrika gelei. Gevolglik is ons werkloosheidsyfer hemelhoog.
Die aandelebeurs het vir die drie jaar tot 30 Junie slegs 3,07% per jaar, dividende ingesluit, opgelewer. Inflasie vir dieselfde tydperk was 5,5% per jaar en die Rand het gemiddeld 7% per jaar verswak teenoor die Amerikaanse Dollar.
In dieselfde tydperk het genoteerde eiendom 13,07% per jaar opgelewer, geldmarkte gemiddeld 6,54% en Inkomstefondse tot soveel as 9,34% per jaar. Die voordeel van ’n gediversifiseerde portefeulje is duidelik sigbaar in hierdie syfers.
Boshoff Visser Konsult se oorgewig posisie in genoteerde eiendom die afgelope jare was tot voordeel van ons kliënte. Meeste van ons portefeuljesamestellings het die afgelope drie jaar ’n blootstelling aan Inkomstefondse van meer as 20% geniet wat kliënte se gemiddelde opbrengste ondersteun het.
Die grootste voordeel van eiendom- en inkomstefondse is die feit dat hulle kwartaalliks inkomste (huurinkomste en rente) uitbetaal.
Dit maak herbelegging moontlik wat tot gevolg het dat ’n kliënt se hoeveelheid eiendom- of inkomstefonds eenhede vermeerder, wat die eintlike bate vir ’n kliënt is en is die hoeveelheid daarvan die bate wat beskerm en gegroei moet word in tye wat kapitaalgroei skaars is. Indien ’n kliënt inkomste uit ’n belegging trek, ondersteun inkomste uitkerings die uitbetalings en verhoed dit dat die fonds eenhede verminder.
Dit is nie nou die tyd om emosioneel te raak oor beleggings nie. Blootstelling aan die regte bateklasse kan steeds ’n opbrengs wat hoër is as inflasie lewer. Boshoff Visser Konsultkliënte het steeds blootstelling aan aandele (plaaslik en internasionaal), aangesien daar steeds goed bestuurde besighede is wat winste vir aandeelhouers maak.
Wat lê voor... Nog politieke moddergooiery, gevolg deur ekonomiese onsekerheid. Dit behoort aan te hou tot ten minste die ANCkonferensie in Desember waar die nuwe party president verkies word. Maak dus reg vir ’n wisselvalligeaandelebeurs en wisselkoers.