‘n Laaste saluut aan Rose
RIVERSDAL Die gemeenskap is geskok na die skielike afsterwe van Rose Evertse op Saterdag 9 September. Sy sal onthou word as Rosie, wat vroeër jare by die spreekkamers van Dr. Kift en vennote werksaam was. Sy begin by Blom Supermark te werk en in 1979 sluit sy haar by die spreekkamer personeel aan as algemene werker en later as ontvangsdame. Hier beleef sy die lief en leed van die gemeenskap, hetsy deur geboortes of sterftes. Sy gaan in November 2001 op pensioen, maar verrig nog diens as afloshulp wanneer die personeel op naweekverlof gaan. Rdl. Chris Taute van die Jack Simmons-tak het in ‘n persverklaring gesê dat die ANC haar heengaan betreur. “Sy was ‘n lojale bestuurslid van die party en was baie betrokke in die gemeenskap en gemeenskapsorganisasies. Sy was tot onder-voorsitter verkies, ‘n posisie wat sy met trots en lojaliteit teenoor die party beklee het. Ons innige medelye aan haar kinders en familie.” Die begrafnis vind Saterdag 16 September om 10:00 vanuit St Andrews Anglikaanse kerk plaas.