'n Veilige hawe vir inheemse wild
HESSEQUA Goedkeuring is van CapeNature verkry vir die ontwikkeling van ‘n uiters noodsaaklike rehabilitasiesentrum en toevlugsoord vir inheemse wild in die Wes-Kaap. Die landgoed Wild Rescue, is halfpad tussen Riversdal en Stilbaai geleë, ‘n geproklameerde natuurreservaat wat grens aan die Goukourivier. Verskeie eko-sones en bedreigde plante word hier aangetref. Hierdie toevlugsoord fasiliteit is oop vir die publiek en veral akademici en nagraadse studente word verwelkom. Wild Rescue is gestig om inheemse wild te behandel en dan vry te laat, asook om ‘n veilige en gelukkige hawe te skep vir diere wat kwesbaar is en nie weer in die natuur vrygelaat kan word nie. Tans bestaan daar geen fasiliteit wat voorsiening maak vir so ‘n groot verskeidenheid van spesies, insluitend primate en klein roofdiere nie. Die stigter, Gill Simpson, gee die versekering aan boere dat diere soos rooikatte, jakkalse, bobbejane en apies nie in hierdie omgewing vrygelaat word nie. Ten einde ‘n waardering van wild en die omgewing te bevorder, is voorligting aan die publiek en spesifiek kinders, ook ‘n verdere doelwit, asook om liefde vir omgewingsbewaring te kweek en veral kennis oor die unieke biodiversiteit van die kontrei onder die publiek te versprei. Die landgoed sal as voorbeeld dien van hoe so 'n taak suksesvol aangepak kan word. 'n Veearts, dr. Douglas Taylor, wat reeds 'n geruime tyd in die omgewing werksaam is, beklemtoon dat so 'n fasiliteit dringend noodsaaklik is vir die oorlewing van plante en diere in hierdie habitat en die bewaring insgelyks van die bio-diversiteit. Volgens Simpson is die boustene van die grondslagfase reeds in die afgelope drie jaar gelê. Hulle is opgewonde oor die volgende praktiese fase wat tot voordeel van wild en bewoners van die Wes-Kaap sal wees. Hulp met die verdere ontwikkeling word nou benodig, soos finansiering, boumateriaal en vaardighede om die rehabilitasiesentrum en toevlugsoord se kampe te ontwikkel, om elektrisiteit deur sonkrag beskikbaar te stel, sowel as die daarstelling van ‘n watertoevoer stelsel. Hulle kan dit nie sonder hulp doen nie. Wild Rescue is ‘n nie-winsgewende organisasie en openbare welwillendheid s organisasie met Artikel 18 a belasting vrystelling goedkeuring. Vir meer inligting en besonderhede besoek www.wildrescue.co.za of kontak Simpson by 028 754 1663 of e-pos wildrescue@mweb.co.za