Studiefonds vir kinders van plaasmoordslagoffers
‘Ons wil seker maak dat die families wat agterbly, spesifiek die jongmense, akademies versorg is en die nodige terapie ontvang.’
SUID-KAAP Vir baie Suid-Afrikaners lê boere na aan die hart en so ook vir Solidariteit Helpende Hand. Om daardie rede is besluit om 'n studiefonds te stig wat op boeregemeenskappe fokus. Die fonds sal spesifiek aangewend word om vir die kinders wie se ouers slagoffers van plaasmoorde was, te sorg sodat hulle hul studies kan voltooi. Sedert 1 Januarie vanjaar was daar reeds 71 sterftes en 341 plaasaanvalle op Suid-Afrikaanse plase. Volgens dr. Danie Brink, besturende hoof by Helpende Hand is dit nog 'n manier waarop mense ons land se boere kan ondersteun. “Ons wil ons medelye aan die gesinne wat deur geweld op plase geraak is betoon en wil seker maak dat die families wat agterbly, spesifiek die jongmense, akademies versorg is en die nodige terapie ontvang.” Die organisasie rig 'n pleidooi aan die publiek om die fonds te ondersteun en daarmee vir die boere te wys dat hulle belangrik is. "Ondersteun die geliefdes van hierdie slagoffers wat dit nie sal kan bekostig om verder te studeer nie omdat hul broodwinners as gevolg van hierdie tragiese gebeure nie meer kan voorsien nie.” Die publiek kan direk tot die fonds bydra deur geld in Helpende Hand se rekening in te betaal, of deur die woord 'Help' te SMS na 38969 ('n SMS kos R10). 'n Verteenwoordiger sal jou skakel om verdere reëlings te tref. Bankbesonderhede Rekeningnaam: Solidariteit Helpende Hand, FNB, rekeningnommer 62331447541, tak - Centurion, takkode 261-550, verwysing - Plaasmoorde.