Almal ware brandbestryders
SUID-KAAP ’n Groep studente het Vrydag 27 Julie ’n uitmergelende vlak 1-brandweeropleidingskursus voltooi en spog ná hul sertifikaatplegtigheid met die kwalifikasie wat wetlik vereis word om brandbestrydingsdienste te verrig.
Ten spyte van onverwagse reën is familie en vriende verras met presisie drilwerk met ’n humoristiese kinkel, ’n formele parade en vlaghysing, asook ’n stigtelike sertifikaatoorhandiging. Mosselbaai se hoof van brand- en rampbestuursdienste, Joseph Johnson, voorsitter van die vereniging van brandweerhoofde in die Wes-Kaap, het die parade saam met verteenwoordigers van die brandweerdienste van die onderskeie deelnemende munisipaliteite geïnspekteer. Hy sê die kursusgangers kom van munisipaliteite in die Eden-distrik, onder meer Hessequa, Kannaland, Oudtshoorn, Bitou en die Eden-distriksmunisipaliteit.
Volwaardige brandbestryders
“Julle het nou die reg verwerf om brandbestryders genoem te word,” het die opleier wat die afgelope vier maande die studente onderrig het, Hein Botha gesê. “Ek is beïndruk met die studente se moed, toewyding en dissipline. Die woord ‘nee’ het nooit tydens die kursus opgeklink nie. Brandbestryding is ’n gevaarlike beroep, die voltooiing van die kursus - vir talle brandbestryders die mees uitmergelende van alle kursusse - het die brandbestryders nou toegerus om die nuwe tegnieke en vaardighede toe te pas. Belangriker nog, wanneer enige van hulle in die toekoms enige situasie moet hanteer, sal hulle hul eie veiligheid veral voorop stel sodat hulle lewens, eiendom en die omgewing sal kan red.” Die hoof van brandbestryding van Knysna, Wayne Sternsdorf, het die seremonie gelei en die brandbestryders gelukgewens met een van die hoogtepunte van hul loopbane. Na afloop van die indrukwekkende seremonie het ouers, vriende en familie die kans gehad om gemoedelik saam met die brandbestryders, instrukteurs en brandweerhoofde te verkeer.