Goukou-plaaswag is goed op dreef
Goukou-plaaswag het in samewerking met die plaaslike gemeenskapspolisiëringsforum en AfriForum ’n opedag op Saterdag 21 Julie aangebied. Die hoofdoel van die plaaswag is om ’n ondersteuningsnetwerk te skep waarby almal in die Suid-Kaap baat kan vind en misdaad in die streek hok te slaan. Die veiligheid van inwoners is hulle prioriteit. Willie Geldenhuys, voorsitter het gesê: “Veiligheid lê ons na aan die hart. Dit is waarom ons die inisiatief geneem het om aktief deel te word van ons omgewing se veiligheid. Ons nooi die hele gemeenskap uit om saam met ons hande te vat vir ’n veiliger toekoms vir almal.” Riversdal het reeds ’n baie aktiewe buurtwag wat talle suksesse behaal en daartoe bygedra het dat die misdaadsyfer in dié dorp skerp gedaal het. Lede van Hoedspruit-plaaswag het die gehoor kom toespreek en meer van hulle suksesverhale vertel. Waardevolle inligting is gedeel om te help om Goukou-plaaswag so effektief moontlik te bestuur. Hessequa-burgemeester Grant Riddles, en onderburgemeester Johannes Hartnick, was ook teenwoordig. Klem is daarop gelê dat buurt- en plaaswagte daar is om die polisie te ondersteun. Arno Greyling, AfriForum se distrikskoördineerder vir die Suid-Kaap het gesê dat AfriForum binnekort veiligheidstoerusting aan dié plaaswag gaan oorhandig. Greyling voeg by: “AfriForum buurt- en plaaswaglede teken ’n streng gedragskode om te verseker dat hulle te alle tye binne die raamwerk van die reg optree. Dié plaaswag vorm deel van ons takstruktuur en het ten doel om die gemeenskap in samewerking met die polisie en ander plaaslike veiligheidsinstansies in tye van nood by te staan.” Johan Crous, hoof van die veiligheidsportefeulje by AfriForum se Hessequa-tak het gesê: “Ons moedig die gemeenskap aan om betrokke te raak en te help om die veiligheid van die Hessequa-streek se inwoners te bevorder.” Goukou Plaaswag se bestuur bedank die borge wat gehelp het om hierdie geleentheid moontlik te maak.