RIVERSDAL IS 180 JAAR OUD
RIVERSDAL Dié dorp is vandag, Donderdag 30 Augustus 180 jaar oud. Die koerant wat jy vandag lees, was vroeër ‘n gratis advertensieblad, die Mikro-Ads wat in 1986 Donderdagaande deur skoolseuns by wonings afgelewer is. Die naam is later verander en die eerste Suid-Kaap Forum verskyn op 6 September 1991. Dus, liewe leser, gee jouself ‘n klop op die skouer. Jy het vandag op jou manier die dorp se stigtingsdag, 180 jaar gelede beleef, gevier en oorleef. Onder leiding van dr. William Robertson, leraar van Swellendam, koop 12 lede die plaas Doornkraal van Hermanus Steyn in Junie 1837, vroeër ‘n leningplaas in 1746. ‘n Kerk word gebou deur die Onafhanklike Godsdienstige Gesticht en erwe word verkoop. ‘n Advertensie verskyn op 31 Augustus 1838 in die Government Gazette, nr. 1706 wat lees: “Die dorp word vernoem na Sir Harry Rivers wat siviele kommissaris van Swellendam was, gebore in 1785 en oorlede op 6 Desember 1861.” Riversdal was die 3de munisipaliteit in die Kaapprovinsie. Die proklamasie het in die Government Gazette van 7 Junie 1848 verskyn. Die munisipaliteit het uit slegs drie lede bestaan aangesien die dorp in drie wyke verdeel was. Volgens dr. Hans Fransen was Langstraat die straat met die mooiste huise in verskillende boustyle. Die vrugbare grond is geskik vir vele landboubedrywighede soos bees- en skaapboerdery, volstruise, koring, olywe, neute, sitrus, wyn en tabak. Die rol wat die Joodse inwoners tot die vooruitgang van die dorp gelewer het, kan nie misken word nie. Onder andere was daar Nainkin-skoenfabriek en leerlooiery, Sam Sagor (die ou Jode-Boer) se winkel, Solly Nainkin, dr. DJ Sagor en ook dr. Leonard Nainkin wat tot sy dood die beste spinale spesialis in die wêreld was. Die oudste bestaande besigheidsgeboue is Snyman Boumateriale (1880), Royal Hotel (1881) en Op die Hoek Kafee (1909) te Barrystraat. Die besighede lewer nog altyd ‘n diens aan die publiek. Gebore en getoeë Riversdallers wat hul merk op die samelewing gemaak het, is JAE Volschenk (skilder, 1853-1936), SV Petersen (digter, 1914-1987), Johannes Meintjes (skilder/skrywer, 1923-1980), Dalene Matthee (skrywer, 1938-2005) en dr. Ivanhoe Becker (eerste bruin mediese dokter). Vandag staan die munisipaliteit as Hessequa-munisipaliteit bekend en bestaan dit uit Gouritsmond, Albertinia, Stilbaai, Melkhoutfontein, Jongensfontein, Vermaaklikheid, Heidelberg, Slangrivier en Witsand. Die hoof administratiewe setel is te Riversdal. Uit ‘n opvoedkundige oogpunt beskik die dorp uit twee hoërskole, een Christelik georiënteerde privaat skool, drie laerskole en vier landelike of plaasskole en verskeie voorskoolse kleuterskole. Die oudste kerkgebou is die St. Matthews Anglikaanse kerk (1856) en die oudste gemeenskapsorganisasie is die Independent Order of True Tempers (IOTT), gestig in 1889. Van die geproklameerde nasionale gedenkwaardighede is Zeekoegat opstal (1960), Puntjie huise (1967), die ou tolhuis in die Garciapas (1968) en Versfeldhuis (Julius Gordon Africana-sentrum) wat op 6 Mei 1966 amptelik geopen is.