Polisie het hul hande vol met inbrake

HEIDELBERG Die plaaslike polisie het hulle hande vol met inbrake en diefstal, veral in die Oos-Dorp. Twee huise in Hoogstraat het onder inbrake deurgeloop op Maandag- 20 en Dinsdagaand 21 Augustus, terwyl daar ook die nag van 22/3 Augustus by ’n huis in Gamblestraat ingebreek is terwyl die huisvrou en ’n vroulike inwoner geslaap het. Goedere van nagenoeg R21 000, waaronder gaar kos, is by die drie persele gebuit. Volgens ao. Alroy Windvogel, plaaslike polisiewoordvoerder, is twee minderjarige jeugdiges by die inbrake in Hoogstraat betrokke. Hulle is onderskeidelik 13 en 16 jaar oud. By die eerste huis, dié van ’n plaaslike speurder, is die egpaar se goue trouringe, asook kos en lekkernye wat in die yskas was, gesteel. Die bak waarin die kos was, is die volgende dag buite ’n huis oorkant die pad gevind. Hulle was nie tuis tydens die inbraak nie. Die kwaaddoeners het glo by ’n venster by die motorhuis ingebreek om toegang tot die huis te verkry. By die ander huis in Hoogstraat die volgende aand is ’n digitale kamera, twee Nokia-batterylaaiers en kos gesteel. Die twee verdagtes is in hul ouers se sorg vrygelaat. Na ’n assesseringsprogram sal die saak na die staatsaanklaer verwys word om te besluit of hulle vervolg gaan word. By die huis in Gamblestraat is toegang by ’n toiletvenster verkry. Juweliersware, vier selfone, waaronder ’n Tablet 7 (raakskerm met ’n pers omhulsel), ’n wit Nokia 201, Huawei (swart, raakskerm met goue plastiekomhulsel) en ’n wit en swart Nokia of Samsung-selfoon (gekraakte raakskerm met ’n rooi omhulsel) gebuit. Niemand is nog in verband met dié inbraak gearresteer nie, hoewel die polisie ’n sterk vermoede het wie daarvoor verantwoordelik is. Enigiemand met inligting oor die misdade kan met speurder-sersant. Whitey Solomon by 084 661 1155, of met die dienssentrum by 028 722 1910, of die noodnommer 10111 in verbinding tree. - Clive Pretorius korrespondent