Brande in streek is veilig verklaar
HESSEQUA/OVERBERG Die brande wat die afgelope paar dae by Kruisrivier en Grootvadersbosch gewoed het, is veilig verklaar.
Alle brandlyne is deurgegaan en grondspanne is onttrek of afgeskaal, wat deur kleiner brandspanne gemonitor word. Alle lugsteun is afgestaan. Die reën wat Dinsdagoggend 6 November in die streek uitgesak het, het baie gehelp. Die 69 persone wat by Garcia-plantasie en Sunkraal-plaas moes ontruim, is intussen weer terug na hul tuistes nadat die gebied veilig verklaar is. “Daar is slegs warm kolle op die lyn. Die vuur het agter oor die berg na die Brandrivier-gebied naby die Kannalandmunisipale grense beweeg waar ’n aktiewe lyn is wat deur grondspanne beheer word,” lui ’n verklaring deur die plaaslike munisipaliteit. Geen beserings is gedurende die operasionele tydperk aangemeld nie. CapeNature meld in hul verslag dat 6 699 hektaar by Garcia, 1 205 hektaar by Grootvadersbosch en 2 667 hektaar by Kruisrivier gebrand het. By laasgenoemde gebied is hulpbronne Dinsdag by twee warm lyne herontplooi, hoewel geen onmiddellike risiko bestaan nie. “Die boere en plaaslike munisipaliteit is besig om die situasie te monitor.” Hessequa-munisipaliteit spreek hul dank en waardering aan alle rolspelers vir bydraes en hulp aan die brandbestryders, personeel wat die GOS-bestuur en die Garcia-inwoners wat ontruim is. “Groot dank is ook aan Gift of the Givers verskuldig vir ruim skenkings in die vorm van voorraad.