KOEL KONTEMPORÊR

#1 So vars!

’n Losstaande bad reg langs die glasskerm van ’n dubbelstort is die toppunt van sjiek in dié weelderige vertrek. Die bad het miskien nie pootjies nie, maar hy sit steeds sy beste voetjie voor! Hoewel die badkamer jare gelede al opgeknap is, verseker die vars wit afwerkings saam met aardse teksture soos glyvaste keramiekteëls en houtkanttafeltjies dat dit nog lank modieus sal lyk. Verhitte handdoekrelings en aparte stortkoppe rond die prentjie af.