KENNERSRAAD
Brandon Fyfe van Thompson’s Plumbing gee riglyne vir wasbakke wat bo-op ’n blad staan:
“Wasbakke wat bo-op ’n blad en dié wat daaronder geïnstalleer word, het verskillende dieptes; hou dit in gedagte voor jy op ’n bepaalde styl besluit,” sê hy. “As jy ’n wasbak bo-op
’n blad wil hê, kan jy ’n wasbakkas gebruik wat effens laer as die standaard-900 mm-hoogte van die vloer af is. Tog vind party mense ’n hoër blad geriefliker – dis maar ’n saak van persoonlike voorkeur.
“Dié wasbakke het nie gate vir die krane nie, daarom moet jou krane óf in die muur óf op die blad langs die wasbak gemonteer word. Een voordeel van so ’n wasbak is dat dit minder snywerk in die blad verg. Met ’n wasbak wat in die blad versink word, moet ’n gat net so groot soos die wasbak uit die blad, hetsy van hout of marmer, gesny word; vir wasbakke bo-op die blad word net ’n gat vir die afvoerpyp en ’n kleiner een vir die kraan (indien dit nie muurgemonteer is nie) uitgesny. Danksy hul vorm neem ronde of ovaal wasbakke bo-op ’n blad ook minder ruimte in beslag as versinkte wasbakke, sodat daar meer plek vir al jou bederfies en bykomstighede is.”
KONTAK thompsonsplumbing.co.za