[V & A ]
met Marietha
IIn dié huis met sy eenvoudige, perfek vierkantige en simmetriese uitleg (die eienaars vergelyk dit met ’n kind se onklaar tekening), gee kleurryke meubels en eksotiese troeteldiere lewe aan elke hoekie.
Dis nommerpas vir Marietha en Keith Quixley, wat in 2013 van Observatory na Plumstead getrek het waar hulle hul seun, Eddie (8), in ’n rustige buurt kan grootmaak. “Ons het begin deur mure uit te breek, matte uit te haal en die kombuis op te knap,” sê Marietha. “Dit was eers in Maart verlede jaar dat ons met die badkamer kon begin.”
Dit was die piepklein bad – net 40 liter water is nodig vir ’n gemaklike skuimsessie – wat die opknap aan die gang gesit het. Marietha het dit op Gumtree ontdek nadat die gastehuis op Jacobsbaai waar dit voorheen gebruik is, sy deure gesluit het. Keith het die pad gevat Weskus toe in sy stokou Daihatsu Rocky wat skaars 80 km/h kon haal. Nou pas dié bad perfek in hul knus badkamer.
Omdat daar ’n aparte toilet reg langsaan is, het die Quixleys besluit om die toilet in die badkamer uit te haal ter wille van meer ruimte. Die grootste konstruksie-uitgawes het gegaan aan ’n groter venster in ’n beter posisie en die vervanging van die groot ou bad en die stort.
Die eindresultaat spreek vanself: Jy hoef nie styl in te boet as jou ruimte én begroting knap is nie – vindingrykheid en ’n helder palet is al die inspirasie wat jy nodig het!
Hoe het julle reggekom terwyl die bou- en
breekwerk aan die gang was? Ek het die pad gevat en by my pa gaan kuier, wat beteken my twee manne moes alleen al die harde werk doen! Die bouery het tydens die droogte plaasgevind, so ons het stortwater in ’n emmer opgevang en die toilet daarmee gespoel. Soms moes ons die kombuiswasbak gebruik vir dinge soos hare was.
Waar kry jy inspirasie? Ek het jare gelede interieurontwerp gestudeer en dit is iets waarin ek nou nog belang stel. Ek bedink gedurig nuwe idees en projekte.
Het jy enige wenke vir mense wat ook ’n badkamerprojek wil aanpak? Die belangrikste les wat ek geleer het, is om maar jou sak te skud vir ’n ordentlike bouer en loodgieter! Wat jou beplanning betref, begin by jou apploustrekker; vir ons was dit die vloere. Daarna kon ons besluit op die res van die kleure.
Hoe het jy en jou man jul dekorstyle gekombineer? My man is ’n praktiese,
“Los dit vir my”-tipe ou. Ek het die ontwerp gedoen en sy werk was praktiese take soos rakke opsit, die stort installeer en die vensters insit.
Is daar enigiets wat julle anders sou doen? Geensins; ons het hier en daar ’n bietjie gesukkel, maar ons het die hele proses geniet.
Wat’s volgende? Die voortuin. Ek wil graag ’n waterwys tuin hê met inheemse grasse en vetplante; iets wat min onderhoud vra, mooi lyk en verskillende hoogtes groei.