Oop en ruim
Nadat die eiendom op hul naam geregistreer is, het die Cupido’s die hulp van ’n argitek ingeroep om planne vir die veranderings op te trek. Die oorspronklike huis was 189 m² groot, maar hulle het meer ruimte nodig gehad; ’n nuwe garage en buitegebou is bygevoeg. Binne is mure uitgebreek om vloei te verbeter en die kombuis groter te maak. Die buite-area is ook vergroot.
Ander groot veranderinge sluit nuwe loodgieterswerk, bedrading vir die hele huis en nuwe plafonne in. Ook maar goed, want hulle het twee indrukwekkende slangvelle ontdek toe hulle die ou plafonne verwyder!
Op die ou end is die huis se grootte verdubbel – en dít sonder die hulp van professionele bouers. “Ek het al heelparty opknapprojekte in vier huise voltooi, so ek het eerstehandse ervaring van die bestuur van ’n bouprojek,” sê Iris. Met die hulp van ’n messelaar en assistent kon hulle al die bouwerk self doen. “Dit was baie kostedoeltreffend en die mure het binne twee weke gestaan,” voeg sy by.
Maar die installering van die vensters, dak, pypwerk en elektriese bedrading was ’n ander saak. “Vir dié deel het ek hulp gekry; jy kan eenvoudig nie kortpad daarmee kies nie!” sê Iris. >>
{Die Cupido’s het onlangs hul huis laat waardeer: Dis nou R2,5 miljoen werd – R1,5 miljoen meer ná die opknapprojek van R250 000.}