‘Opknap is ons brood en botter’
Dié innoverende paartjie het hul talent vir huise regruk in ’n winsgewende bedryf omskep.
Die Croesers het die kombuis geskuif van die middel na die voorkant van die huis sodat dit in ’n oop plan met die eetkamer skakel.
Die treffende blou op die fokusmuur is ’n kleur wat Kelly uit verskillende kleure by Mica laat meng het. Die paartjie se goeie vriende van Time out Creations en Hanga Steel het hand bygesit met die bou van ’n nuwe trap na die solder (nou ’n slaapkamer); die reling van rou yster verleen ’n tikkie industriële styl.
Hulle het die Oregondennehouttafel van Zimbabwe gebring. “Dit was op ’n tyd ’n kunstafel vol verf; toe kou die plaashonde die pote stukkend; later was dit ’n garage-werktafel. Uiteindelik, nadat Johnathan dit afgeskuur het, is dit ons eetkamertafel,” verduidelik Kelly. Johnathan het die bankies van steierplanke gemaak. Kelly en Johnathan Croeser en hul dogter, Georgia (18) Vishoek 165 m² Noord
Kelly en Johnathan het in 2010 van Zimbabwe af Suid-afrika toe getrek. Met hul aankoms het die uitdaging om so gou moontlik ’n bron van inkomste – en blyplek – te kry, hulle in die gesig gestaar. Maar ná ’n onseker begin het die vernuftige paartjie ’n plan bedink om twee vlieë met een klap te slaan: Koop afgeremde eiendomme teen ’n billike prys, bly daar terwyl hulle dit regruk, en verkoop dit teen ’n wins.
Die plan het gewerk en nou, ses jaar later, is hulle ’n gesoute span wat bouvallige ruimtes in pragtige huise verander. En hulle het altyd blyplek. Elke opknap duur sowat ’n jaar en hulle doen so te sê alles self – tot die teël- en loodgieterswerk. En met elke opknapprojek kom hul bouer, Onias Banda, heelpad van Zimbabwe af om te kom help.
Die Croesers is ywerige upcyclers en sê die huis in Vishoek, hul nuutste projek, is een van hul gunstelinge (dis al klaar verkoop ...).
“Dit was ’n klein, outydse huis met twee slaapkamers, een badkamer, ’n mengelmoes van vensters en ’n afgeskeepte tuin,” vertel sy. Die vensters was te hoog en die kombuis was in die middel van die huis, met ’n klomp klein vertrekke rondom, wat die huis beknop laat voel het. Boonop was die werkoppervlakke amper borshoogte – heeltemal onprakties!
Maar die Croesers het die potensiaal van die houtvloere, hoë plafonne en ruim solder raakgesien. “Nou kan ons dit met trots beskryf as ’n pragtige, ruim huis met drie slaapkamers, drie badkamers en hope karakter en sjarme,” sê Kelly.
Al is sulke projekte hul inkomstebron, hoop Kelly en Johnathan om eendag vir meer as ’n jaar in ’n huis te bly.
“Uiteindelik sal ons ’n permanente plek van ons eie hê!” >> Die paartjie het die ongewone hoogte van die vensters tot hul voordeel gebruik en ’n sonnige eethoekie in die kombuis geskep. Hulle het die ou, vrot meranti-vensterrame vervang met wit kothuisvensters wat hulle by ’n slopingsfirma gekoop het. “Dit het ons baie geld gespaar; die vensters het boonop nog hul oorspronklike diefwering en glas gehad,” sê Kelly. Ou vurke en lepels is gebruik as handvatsels, en leë fotorame is as omraming vir die kaste se lugopeninge. Dis met spaanderbordskroewe aan die deure geheg. “Die rame was bekostigbaar en gee die saai ou kaste ’n bietjie diepte en Franse flair,” verduidelik Kelly.
Die swart hanglamp is eintlik ’n kershouer wat onderstebo hang, en die Oregondennehout-kas ( links op die foto) was eers hul Tv-kas; Kelly het dit met ’n mengsel van oorskiet-akrielverf vernuwe. Die Croesers het ’n fortuin bespaar deur die oorspronklike kombuiskaste weer te gebruik. Johnathan het die werkblaaie uit ’n ou trap se hout gemaak. Wenk
“Kikker kombuiskaste met badkamerverf op – dit het ’n mat afwerking, word gou droog en is waterbestand, wat beteken dis maklik om skoon te maak,” raai Kelly aan.
Die vrolike, geblomde kwilt en die mat is in Zimbabwe op veilings gekoop. Kelly is dol oor die ouwêreldse gevoel van die bad in die en suite-badkamer wat ’n buitevertrek was voor hulle die buitedeur toegebou het. Die ruimte is in twee verdeel om plek te maak vir ’n instapkas (die deur links). Herwinde deure met glaspanele laat lig in. “Moenie verweerde houtvloere vervang nie; beits dit eerder in ’n donker kleur,” sê Johnathan.
Voor Die stensiltegniek teen die muur is Kelly se handewerk. Dis geverf met ’n mengsel oorskietverf van vorige projekte. Wenk