Skoon, vars en ruim!

“Ons volg nie die mode nie; ons doen wat vir ons reg voel,” sê die kunstige eienaars van dié unieke huis oor hul bouprojek.

O“Ons Europese plaas-villa.” Dis hoe Ruben en Tracey le Roux hul huis in die suide van Johannesburg beskryf. En as jy dink dis vergesog, moet jy net luister hoe Tracey vertel waar die invloede, inspirasie en materiaal waarmee hulle dit tot stand gebring het, vandaan kom; dan besef jy dié beskrywing is in die kol.

“Ons het ’n basiese idee van die uitleg gehad, maar toe dit by die binneversiering kom, het elke vertrek ons ‘vertel’ wat daar sou werk,” sê Tracey. “Dit het geleidelik gebeur. Van die begin af was die hele idee dat ons huis moet lyk soos ’n ou Franse plaashuis wat gerestoureer is, al is dit nuut gebou.”

Die Le Rouxs het heelwat tyd en energie aan die ontwerp van hul droomhuis bestee en uiteindelik die geleentheid gehad om artikels wat hulle die afgelope 30 jaar op talle reise bymekaargemaak het, te gebruik.

Natuurlike materiale soos koper, gietyster, leer en hout verskaf warmte en beweging. “Omdat die materiale nie nuut is nie, dra hulle die tekens en merke wat van hul karakter en geskiedenis getuig,” sê Tracey. Dit skep onmiddellik ’n ingeleefde atmosfeer wat ’n mens nie dikwels in ’n nuutgeboude huis kry nie. >>

Buffet van Block & Chisel; lampe, skale, koskas en kleurglas op die vensters van Oudewerf Auctions; slagtersblok van Old Johannesburg Warehouse; gasstoof van 44 Stanley; die koolstoof is by vriende gekoop