Getooi in blou

Die fasade van ’n verlate en vervalle ou huis het ’n splinternuwe baadjie gekry – en kyk net die lekker stoep!

Vir jare het die kranige selfdoener Catherine Pate dekorprojekte voltooi, ou meubels gerestoureer en klein opknapprojekte aangepak. Maar toe sy in 2013 afkom op ’n verwaarloosde huis in haar tuisdorp, Porterville, naby haar en manlief Warwick se eie huis, het sy die kans met albei hande aangegryp om ’n “regte” opknap te doen.

Heel eerste aan die beurt was die huis se fasade, insluitend ’n 10,5 m lange stoep. Catherine, die eienaaar van die reklameagentskap CP Communications & Publicity, en Warwick, die eienaar van die afvalvervoermaatskappy Waste Pro, se begroting was knap; daarom het hulle die meeste van die werk self gedoen, insluitend mure uitbreek, pleister en verf.

Die stoep se mooimaak het sowat drie weke in beslag geneem (hulle kon net ná ure en naweke werk) en nou is dié stoep ’n heerlike plek om die trekkers en perdekarre dop te hou wat hier verbykruie.

“Dit was lieflik om te sien hoe Elephant Cottage, soos ons dit gedoop het, pragtig en trots ontpop uit die afgeskeepte gebou wat hier gestaan het,” sê Catherine. >>