Steakslaai

Genoeg vir 4–6 Bereidingstyd: 20 minute plus marineertyd Gaarmaaktyd: sowat 10–15 minute, afhangend van die dikte en hitte

• 2 ekstradik kruisskywe (“rump steaks”, sowat 300g elk) MARINADE • 3 knoffelhuisies, fyngekap • 1 duim vars gemmer, gerasper • 5ml elk fyngestampte heel komyn en koljander • ’n knippie cayenne • 15ml ligbruinsuiker • 30ml klapperolie, gesmelt • 30ml oestersous • 15ml vissous SLAAI • 1–2 komkommers, geskil en dungesny • 4–6 radyse, dungesny • 3 mediumgroot wortels, dungesny • 1 klein koolkop, fyngesnipper • 200g mangetout-ertjies, gekap • 1 bossie sprietuie, fyngekap • ’n hand vol babaslaaiblare SLAAISOUS • 1 groot groen brandrissie, fyngekap • 30ml sesamolie • 30ml rysasyn • knippie suiker • 45ml lemmetjiesap (of na smaak) • 15ml vissous • 45ml laesout-sojasous • 15ml geroosterde sesamsaad

1 Meng die marinadebestanddele in ’n Ziploc-sakkie en laat die steak vir sowat 1 uur daarin lê. 2 Sny solank al die slaaibestanddele mooi fyn en hou eenkant. Klits al die slaaisousbestanddele saam, of nog beter: Meng dit in ’n glasflessie met ’n deksel sodat jy dit kan skud. Steek nou die vuur aan – jy het warm kole nodig. 3 Braai die steaks vir sowat 3–4 minute aan elke kant vir medium-rou en maak seker daar is ’n leksel vlamme om die steak ’n lekker gekaramelliseerde kors te gee. Draai soos jy goeddink om te keer dat die sousie brand. Laat rus die vleis vir 5–10 minute in die braaibak of toegedraai in foelie. 4 Sny die steak in dun skyfies en sit dit voor saam met die slaai wat met die slaaisous bedruip is. Eet warm met liggeroosterde tortillas, platbrode of pitas.