Planne met pizzadeeg

Vryvorm-lentepizzas

Laat die pizzaspaan se grootte jou lei hoe groot jy die deeg moet uitrol en hoeveel deeg jy per pizza nodig het – vir ’n klein spaan soos ons s’n is ’n gholfbalgrootte genoeg. Knyp die deeg af en rol dit dun uit (omtrent so dik soos ’n pannekoek) op ’n skoon, meelbestrooide oppervlak. Lig die deeg versigtig op die pizzaspaan wat dik met meel bestrooi is. Sit nou stukkies sagte bokkaas en skyfies rooi uie bo-op. Gebruik die spaan om die pizza in die voorverhitte pizza-oond in te skuif. Bak vir ’n paar minute tot goudbruin en borrelend – hou maar dop, dis ’n vinnige proses en dit kan dalk nodig wees om die pizza halfpad deur te draai. Sodra dit warm uit die oond kom, voeg ’n sprinkel gaar ertjies, geblansjeerde dun groenboontjies of aspersies en ’n paar ment- en basilieblaartjies by die bolaag. Geur met sout, peper en ’n leksel olyfolie en smul terwyl dit warm is. Herhaal met die res van die deeg.

Mexikaanse pizza

Sny 1 ryp avokado in 8 wiggies en draai ’n reep spek om elkeen. Verhit ’n gietysterpan op ’n driepoot oor die kole tot lekker warm. Giet ’n skeut olyfolie in die pan en braai die avo-rolletjies tot die spek bros is. Bedruip vir die laaste minuut met sriracha-rissiesous. Maak ’n pizzabasis soos hierbo en sit dit op ’n meelbestrooide pizzaspaan. Smeer tamatiepuree oor en rangskik gehalveerde kersietamaties, jalapeñorissieskyfies en mozzarellakaas bo-op. Bak weer vir ’n paar minute tot goudbruin en borrelend. Pak die gebraaide avo-en-spekbondels bo-op die pizza sodra dit uit die oond kom, en smul terwyl dit lekker warm is.

Knoffel-platbroodjies

Sit 2 heel knoffelbolle (middeldeur gesny) en 1 heel brandrissie in 150 ml olyfolie in ’n klein oondbak, bedek met foelie en rooster teen 180 °C vir sowat 30 minute tot sag en goudbruin. Laat die knoffel en rissie in die olie afkoel. Druk die sagte knoffel uit die skille en meng met 250 ml botter en ’n hand vol gekapte sagte kruie soos grasuie, platblaarpietersielie en basilie. Hou die knoffel-en-rissiegegeurde olie om oor jou pizzas te sprinkel. Rol 4 balle deeg (gholfbalgrootte) plat uit en plak van die gegeurde botter op en, as jy wil, sprinkel met gerasperde parmesaankaas. Rol op en knoop elke deegrolletjie sodat dit ’n ronde pakkie vorm; rol dié dan 1 cm dik uit. Bak die platbroodjies in die pizza-oond (onthou om halfpad deur om te draai sodat die agterkant na die vuur wys) en sit dit as voorgereg voor – dit sal vol geurige, bros voue en krake wees.

Stokbrood

Stokbrood maak is seker die beste toets van geduld onder die son en ’n heerlike manier om oorskietdeeg te gebruik.

Jy het ’n deegballetjie omtrent so groot soos jou vuis vir elke stokbrood nodig. Kies ’n stewige stok van duimdikte wat goed droog is. Vir ekstra lekkerte het ons ’n gaar varkworsie oor die punt van ons stokke gedruk, maar dis opsioneel. Rol nou die deeg in ’n wors van minstens 30 cm lank. Knyp die punt van die deegwors by die bopunt van die stok oor die varkwors vas en draai die res van die deeg sorgvuldig om en om tot die hele wors bedek is. Druk die laaste punt so goed moontlik vas sodat dit nie later loswoel terwyl jy braai nie. Dis ’n goeie idee om eers die stokbrood vir so 5–10 minute hoog bo die kole te hou dat die deeg effens kan rys; laat sak dan die broodjie tot waar die hitte matig voel en draai stadig tot die hele buitekant ligbruin en die broodjie gaar is. Dit behoort so 10–20 minute te neem, afhangend van die uiteindelike dikte. Sit voor met plaasbotter en jou gunsteling-tamatiesmoor om in te doop. Heerlik. 1 Meng die gaar botterskorsie, soetrissierepe, feta en neute saam en geur met sout en varsgemaalde swartpeper. Wanneer jy die botterskorsie rooster, kan jy dit geur met kruie, suurlemoen en brandrissie – dit sal bydra tot die vulsel se geur (onthou net die feta is reeds sout). 2 Verf nou 1 vel fillodeeg met ’n bietjie botter en plaas ’n tweede vel bo-op. Skep een derde van die vulsel oor die lengte van die deeg en rol op. (Bedek die res van die deegvelle met ’n klam vadoek om te keer dat dit uitdroog terwyl jy werk.) Herhaal met die res van die bestanddele en maak 3 rolle. Sny elke rol in 6 ewe dik skywe (sny meer of minder skywe, afhangend van die afmetings van jou bak) en pak die skywe langs mekaar, gesnyde kante na bo, in ’n oondbak. Giet die room oor – nou’s dit gereed vir die oond. 3 As jy ’n konvensionele oond gebruik, voorverhit dit tot sowat 180 °C en bak vir 45 minute tot mooi goudbruin. Indien jy ’n pizza-oond gebruik, sorg dat die temperatuur tussen 180 °C en 220 °C is (gebruik ’n infrarooi-termometer) en sit dan die pampoentert in vir 10 minute, draai en bak 10 minute, draai en bak nog 10 minute tot goudbruin. Eet dadelik of by kamertemperatuur as bygereg.